भांगरभूंय | प्रतिनिधी
अमरनाथ: अमरनाथ गुहेंतल्या बर्फाचें सैमीक शिवलींग पुरायेन विरगळ्ळें. यात्रेचे फकत पांच दिसूच जाल्यात. ५७ दीस चलपी ही यात्रा ३ जुलयाक सुरू जाल्ली.
यात्रेच्या पयल्या चार दिसांनी सुमार ८६ हजार भाविकांनी पवित्र गुहेंत दर्शन घेतलें. अधिकार्यांच्या मतान, मंगळारा पांचव्या दिसा हो आंकडो १ लाखां फुडें वचपाची अपेक्षा आसा.
यात्रे खातीर अंदूं ४ लाख भाविकांनी नोंदणी केल्या. म्हळ्यार अजूनय ३ लाखां परस चड भाविकांक दर्शन घेवपाचें आसा.
२३ मेक शिवलिंग ७ फूट उंचायेचें आशिल्लें
२३ मेक बीएसएफ जवानांनी जारी केल्ल्या फोटवांत शिवलिंगाचो आकार ७ फूट आशिल्लो. २९ जुनाक पयले पुजेच्या दिसाय हिमलिंगची उंचाय ५ फुटां परस चड आशिल्ली. ६ जुलयाक मुखार आयिल्ल्या फोटवांनी हिमलिंग सुमार ९०% गायब जाल्लें दिसता.
४८ किमी लांब नुनवान-पहलगाम मार्ग आनी १४ किमीचो ल्हान, मात कठीण बालटाल मार्गावेल्यान भावीक दर्शना खातीर सेगीत पावतात. ही यात्रा २८ ऑगस्टाक रक्षाबंधनाच्या दिसा सोंपतली.
अमरनाथचे बाबा बर्फानी सैमीक तरेन तयार जाता, तांकां घडयनात
अमरनाथचे हिम शिवलिंग बर्फाक कोरांथून करिनात. तें सैमीक बर्फाचें स्टॅलेग्मायट जावन आसा. जशीं चुनखडीच्या गुहेंत जमनींतल्यान खनिज जमा जावन स्टॅलेग्मायट तयार जाता, तशेंच अमरनाथ गुहेंत पांख्यावेल्यान गळपी उदका पसून बर्फाचें शिवलिंग तयार जाता.
हाचो आकार दर वर्सा हवामान, तापमान आनी उदकाची उपलब्धताये प्रमाण वेगवेगळो आसता. हेंच ताचें खाशेलपण.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
