अभ्यासा बरोबर कराटे शिकल्यार ताचो लाव भुरग्यांक जातलो: दाभोळकार

भांगरभूंय | प्रतिनिधी

कराटेच्या मळार आपलें नांव करून ह्या मळार मोलाचें योगदान दिवपी गौरीश दाभोळकार ‘ट्रॅडिशनल कराटे असोसिएशन ऑफ गोवा’ हे संघटनेचे उपाध्यक्ष जाले. तांचे कडेन सध्या कितलींशींच भुरगीं कराटे शिकतात आनी राष्ट्रीय पांवड्यार आपलें योगदान दितात. भुरग्यांनी अभ्यासा वांगडा कराटेय शिकचें अशें तांकां दिसता. तांकां कराटेंत मेळिल्ल्या येसा विशीं भूषण शिरवयकार हांणी तांचे कडेन संवाद सादलो, तेन्ना तांणी सांगलें:

कराटे ह्या खेळा कडेन तुमी कशे आकर्शीत जाले?
हांव शाळेंत शिकतना एकदां हांवें ब्रूस लीचो चित्रपट पळयिल्लो. तातूंत ब्रूस ली कराटे करतना म्हाका खूप आवडिल्लो आनी अशें करून हांव ह्या खेळा कडेन आकर्शीत जालों. उपरांत आवय आनी बापायन म्हाका लागींच्या कराटे वर्गांत घालो. सुरवेक हांव खूब भियेतालों. आनी फाटल्यान रावतालों, पूण जशे जशे दीस गेले, म्हजे भितर आत्मविश्वास आनी उर्बा तयार जाली. हांवें सदांच म्हजे गुरूंचें आयकलां, देखून हांव ‘ब्लॅक बेल्ट’ जालों. हें करतना म्हजी एकाग्रता वाडली तशेंच जिणे कडेन पळोवपाचो दृष्टीकोन सकारात्मक जालो.
तुमचें प्रेरणास्थान गुरू विशीं सांगशात?
1990 ह्या वर्सा हांव सेन्साई जगदीश भोबे हांच्या वर्गांत गेलो. ते म्हजे पयले गुरु. तांणी म्हाका “GOJU RYU STYLE” हि पद्दत शिकयली, मागीर हांवें वेगवेगळ्यो पद्दती आनी तरा शिकून घेवपाक सुरवात केली. म्हाका ग्रँडमास्टर एस श्रीनिवासन हांचे कडेन शिकतना म्हजो पयलो ‘ब्लॅक बेल्ट’ फावो जालो. मार्टिन पोएट हें जर्मनींतल्यान आयिल्ले म्हान मास्टर, तांचे कडेन हांवें चार वर्सां कराटेचे धडे घेतले. म्हाका कोबूडो ही शस्त्र चलोवपाची कला मास्टर शिहान एम. रवी हांणी शिकयली. तशेंच फुडें वचून हांवें इहाची ओटा जे ब्लॅक बेल्ट डॅन 10 आसात तांचे मार्गदर्शना खाला तिसरो ब्लॅक बेल्ट मेळयलो. म्हाका म्हजो सवो ब्लॅक बेल्ट मास्टर बाबू एस नायर जे शोतोकान कराटे फेडेरेशन इंडियाचे अध्यक्ष जावन आसात, तांच्या प्रशिक्षणांतल्यान फावो जालो. म्हजी कराटेची आवड सांबाळपाक मोलाचो वांटो आसा तो म्हज्या आवय आनी बापायचो तांणी म्हाका केन्नाच आडायलो ना.
कराटे खेळाक जोडून तुमच्या जिणेंतलो सगळ्यांत उगडासांत उरपा सारको खीण?
म्हज्या काळजांत लागीं अशें दोन खीण हांव सांगूक सोदतां. पयलो 26 डिसेंबर 2018 इंदोर हांगां जाल्ले 64 व्या राष्ट्रीय खेळां सर्तींत म्हजो विद्यार्थी वेद प्रभू वादोळकर हाणें 16 वर्सां सकयल्या गटांत जिखिल्लें रुप्या पदक आनी निहाल नायक हाणें रचिल्लो इतिहासीक पावंडो, जो ताणें एस जि एफ आई हांणी घडोवन हाडिल्या 65 वे राष्ट्रीय खेळा सर्तींत 2019-20 ह्या वर्सा भांगराचे पदक मेळोवन दाखयलो. हे दोगूय म्हजे विद्यार्थी.
कराटे हो खेळ तरणाट्यांनी कित्याक खेळचो अशें तुमकां दिसता?
20 वर्सां पिरायेचो आसतना हांवे फिल्ड ऑफिसर म्हूण काम पळयलां. पूण त्या कामांत म्हाका समाधान मेळनाशिल्लें. तेन्ना हांवें पूर्ण वेळ कराटे प्रशिक्षक म्हूण सुरवात केली. 1995 वर्सा सावन हांवे वर्ग घेवपाक सुरवात केली. म्हजो पयलो वर्ग नावेले चालू जालो. पूण खऱ्या अर्थान म्हजे वर्ग सुरू करपाक मोलाचो वांटो आसा तो मडगांव क्रिकेट क्लब ह्या संस्थेक. तांणी म्हाका वर्ग घेवपाक जागो दिवन खूब मजत केली. मागीर म्हजे वर्ग घोगळेश्वर आनी मारुती मंदिर हांगांय सुरु जाले. आयज म्हजे कडेन 120 ते 130 भुरगीं शिकतात. तशेंच हीं भुरगीं वेगवेगळ्या सर्तींनी इनामां जिखतात.
तुमचो एक विद्यार्थी राष्ट्रीय मळार पर्जळटा. ताचे विशीं सांगशात?
हय, म्हजे विद्यार्थी राष्ट्रीय मळार नांव मेळयतात आनी तांणी आंतराष्ट्रीय मळार भारताचें नांव करचें ही आस बाळगितां. ताका लागून म्हाका पालकांक एक गजाल सांगीनशी दिसता. निरज चोप्रान भांगरा पदक मेळोवचें पयलीं भालो फेकप हो खेळ तितलो लोकां मदीं रुजू नाशिल्लो. आयज आमी दर एक खेळ तेच दृष्टीन पळयतात. चडशे पालक खेळांक दुय्यम स्थान दितात जाका लागून भुरगें जेन्ना आपल्या खेळाच्या परमोच्च तेंगशेर आसता. अभ्यास खूब गरजेचो पूण ताचे बरोबर खेळाकय तितलेंच म्हत्व दिवपाक जाय. आज आमचें सरकार ‘खेलो इंडिया’ सारकी उमळशीक वाडोवपी कार्यावळ करता जेणे करून आमकां नवे नवे खेळगडे मेळटात.
मुळांत कराटे खेळ हो भारतांत जल्मलो अशें मानतात. तेन्ना त्या इतिहासाचेर थोडोभोव उजवाड घालश्यांत?

सारकें, सेन्साई परवेझ मिस्त्री हे भारतांतले पयले “ब्लॅक बेल्ट ” जांणी कराटे हांगा हाडलो वर्स आशिल्लें 1969. तशेंच 1977 ह्या वर्सा तांणी Karate India Do Federation ताचें फुडारपण केलें. आनी कराटेक भारतभर पसरायलो. दारूमा हें झेन बौद्ध पंथीय, जांणी 1400 त भारतांत बौद्ध संस्कृती सुरवात केली, तरीय मान्यताय अशी आसा की ताणींच ही प्रथा भारतांतल्यान चीन देशांत व्हेली.
कराटे खेळ पळयतना, हो खेळ झुजाचोच एक प्रकार न्हय मूं? असो प्रश्न पडटा. कित्याक. काय म्हणल्यार आयज मेरेन खास करून सिनेमांनी कराटे हो हिंसा करपाचो एक माध्यम म्हूण दाखयला. देखून लोकां मदीं ह्या खेळां विशीं एक प्रकारचो गैरसमज पसरला अशें दिसता. तुमचें कितें म्हणणें आसा?
हय, सारकें. पूण कराटे म्हळ्यार हिंसा न्हय. हें आमी मतींत दवरूंक जाय. कराटे हो आत्मरक्षणाचो एक प्रकार. कराटे हाचो अर्थ रिकाम्या हातान. ह्या प्रकारांत काटा आनी कुमिटे अशें दोन गट असतात. काटा म्हळ्यार आपले कसब दाखोवप आनी कुमिटे म्हळ्यार स्पर्श करिनासताना गूण घेवप. कराटे म्हळ्यार एक कला. न्हय हिंसेचो प्रकार. हें सगळ्यांनी जाणा जावपाक जाय.
कराटे हो एक शिस्तबद्ध प्रकार अशें नांव आसा. हि शिस्त कशी आपणावप आनी ती कशी पालन करप. हाचेर तुमचे विचार?
कराटे म्हणलें की शिस्त आयलीच. सदांच एक कराटे जेन्ना आपल्या रिंगणांत म्हणल्यार ‘डोजो’ येता. तेन्ना सगळ्यांत पयलीं तो त्या जाग्याक मान दिता. मागीर गुरुक आनी बराबर आशिल्ल्या कराटेपटूंक. तशेंच जाणटेल्यांक आदर भुरग्यांची विचारपूस करप मदत करप हें कराटे शिकयता.

नव्या शिक्षणीक धोरणांत हांचो कराटेक इनडोर गेम म्हूण आस्पाव करूंक जाता व्हय ? जाता जाल्यार कसो? तुमचें मत?
अशें जाता जाल्यार खूब बरी गजाल. आमचो सदांच तेंको आसतलो. नवीन शिक्षणीक धोरण आयज खेळांत जायत्यो संदी उपलब्ध करून दिता. आमच्यो संघटना त्या विशयाचेर काम करता आनी कराटे हो विशय शाळांनी आत्मरक्षण म्हूण शिकोवपाक घेवचो म्हूण आमचे संघटन एक योजना तयार करता. जेणें करून हो विशय नवे शिक्षणिक धोरणाक कसो संलग्न जातलो हाजेर अभ्यास चालू जाल्लो आसा. हाचे बरे परिणाम रोखडेच दिसपाक लागताले.
कराटे हो आयज ऑलिम्पिकांत खंयच्या सुवातेर आसा? आनी हालींच गोंयांत जाल्ल्या राष्ट्रीय खेळां सर्तींत ताचो आस्पाव कित्याक जालो ना ?
2020 ह्या वर्सा टोकियो ऑलिम्पिक स्पर्धेंत कराटेचो आस्पाव आशिल्लो. पूण गेलीं कांय वर्सां तो ना जाला. हें सत्य न्हयकारूंक जायना. आंतरराष्ट्रीय मळार हांचेर भासाभास चालू आसा आनी फुडल्या सर्तींनी ताचो खात्रेन आस्पाव आसतलो. खंतीन सांगतां, अंदूं राष्ट्रीय सर्तींत कराटेक फावो ती वळख मेळूना, पूण आमचे संघटन सक्षम आसा आनी येता त्या वर्सा तुमी आमचे अस्तीत्व पळयतले. घडये आमचे भुरगें गोंयचे वतीन वांटो घेतले.
बायलांनी वा चलयांनी कराटे शिकल्यार तिका कितें आणि कसो फायदो जातलो अशें तुमकां दिसता ?
कराटे शिकल्यार एक चली भुरगें मानसीक पातळीचेर आत्मनिर्भर जाता, तें आत्मविस्वासान जीण जगता. तशेंच तें दुसऱ्याक आदारान पळयता आनी कोणूय त्रासांत आसा जाल्यार ताका मजत करपाची भावना दवरता. तशेंच कराटे करतना केल्लें व्यायाम आनी ध्यान ताका शारिरिक मळार एक सशक्त कूड निर्माण करता. देखून पालकांनी भुरग्यांक कराटे सारख्या खेळाक धाडचे. जेणेकरून भुरग्यांचो सर्वांगीण विकास जाता.
कराटे सोडून तुमचो आवडिचो दुसरो खेळ खंयचो ?
किक्रेट
तरणाट्यांक कितें संदेश दिवंक सोदतात ?
अभ्यासा वांगडाच तरणाट्यांनी जिणेंत खंयचोय तरी एक खेळ खेळचो. ताची मानसीक भलायकी घटमूट रावन मनीस जिणे कडेन सकारात्मक पद्दतीन पळयता. तशेंच जिणेंतल्या संघर्शाक धाडसान फुडो करतां होच म्हजो संदेश आसा.