भांगरभूंय | प्रतिनिधी
पणजी : ‘दिल्ली रूलर्स ऑफ इंडिया नाव कॉंकर गोवा,’ ही वादग्रस्त जायरात अभिनंदन लोढा समुहान फाटीं घेतल्या. भावना दुखावल्ले खातीर चूक मागतना लोढा समुहान गोंयची संस्कृताय आनी दायजाचो आमी आदर करता अशें पत्र गोंय सरकाराक धाडलां.
लोढा समुहान जायरात फाटीं घेवपा वांगडाच चूक मागपाचें पत्र सरकारच्या गृह खात्याक धाडलां. ही वादग्रस्त जायरात समुहा वरवीं प्रसिद्ध जाल्ल्याचें कळ्ळे उपरांत ३१ जुलय दिसा ती काडून उडयिल्ल्याचें समुहान गृह खात्याक धाडिल्ल्या पत्रांत म्हणलां.
लोढा समुहाने राज्यांत बांदकाम प्रकल्प सुरू केला. ह्या प्रकल्पाची राज्यांत सगळे कडेन जायरात सुरू आसा. ‘दिल्ली, रूलर्स ऑफ इंडिया, नाव कॉंकर गोवा’ ही टॅग लायन वापरल्या. दिल्लीकार गोंय जिखपा खातीर येतात, असो ताचो अर्थ जाता. विधानसभेंतूय हो प्रस्न आयिल्लो. जायत्या जाणांनी टॅग लायनीक आक्षेप घेतले उपरांत सरकारान बिरेस्तारा अभिनंदन लोढा समूहाक नोटीस जारी केल्ली. जायरात फाटीं घेवंक ना जाल्यार सरकारान कारवायेची शिटकावणी दिल्ली. ही जायरात ३१ जुलयाक फाटीं घेतिल्ल्याचें पत्र समृहान धाडले उपरांत हो वाद सोंपला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
