भांगरभूंय | प्रतिनिधी
पणजी ः अखिल भारतीय विद्यार्थी परिशदेन (अभाविप) आयज पणजेच्या सरकारी तंत्रनकेतन मुखार आंदोलन केलें. ह्या वेळार विद्यार्थ्यांक येवपा- वचपाक चड बशी दिवप, जेवणाचो वेळ बदलप, वाठारांत नितळसाण दवरप, जिमखाना दिवप अशो वेगवेगळ्यो मागण्यो केल्ल्यो. ह्या वेळार शंबरां परस चड विद्यार्थी हाजीर आशिल्लें.
सध्या विद्यार्थ्यां खातीर फकत एक बस आसा. तांतूत 30 जाणांक बसपाची तांक आसतना 40 ते 45 भुरग्यांक बसयतात. हाका लागून विद्यार्थ्यांची सुरक्षीतताय धोक्यांत आसा. एकूच बस आशिल्ल्यान जायत्या विद्यार्थ्यांक सकाळचे वर्ग चुकतात. हे खातीर आमी चड बशी दिवपाची मागणी केल्या अशी म्हायती आंदोलन करपी विद्यार्थ्यांनी दिली.
हाचे भायर म्हाविद्यालयाचो वेळ सकाळीं 9 ते सांजवेळा 5 असो करचो, सकाळीं 11 वरांचेर च्याचो वेळ दवरचो, जेवणाचो वेळ दनपरां 12.15 बदला दनपारां 1 उपरांत करचो, वेंचणूक आयोगाक दिल्लो जिमखाना परत घेवन विद्यार्थ्यांक दिवचो, नवें बँचांची पुरवण करची, शौचालयां निवळ दवरचीं, वेळोवेळ इमारतीची देखरेख करची, अश्योय मागण्यो ह्या वेळार केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
