भांगरभूंय | प्रतिनिधी
पणजी: काँग्रेसीच्या आठ फुटीर आमदारां आड आदले प्रदेशाध्यक्ष गिरीश चोडणकार हांणी सभापतीं आड दाखल केल्ले याचिकेचेर मंगळारा सर्वोच्च न्यायालयांत सुनावणी जाली. दोनूय वटांचें म्हणणें आयकून घेतले उपरांत न्यायालयान फुडली सुनावणी तीन सप्तकांनी घेतले अशें स्पश्ट केलां.
राज्य विधानसभा वेंचणूक जाले उपरांत स म्हयन्यांनी 14 सप्टेंबर 2022 दिसा काँग्रेसीच्या उमेदवारीचेर वेंचून आयिल्ले तेन्नाचे विरोधी पक्ष फुडारी मायकल लोबो हांचे सयत दिगंबर कामत, आलेक्स सिक्वेरा, संकल्प आमोणकार, डिलायला लोबो, केदार नायक, राजेश फळदेसाय आनी रुडॉल्फ फर्नांडीस ह्या आठ आमदारांनी भाजपांत प्रवेश केलो. तांचे आड गिरीश चोडणकार हांणी 11 नोव्हेंबर 2022 दिसा सभापती कडेन अपात्रताय याचिका दाखल केल्ली. खूबशे म्हयने सभापतीन ह्या याचिकेचेर सुनावणी घेवंक नाशिल्ल्यान चोडणकार हांणी उच्च न्यायालयांत धांव घेवन सभापतींक अपात्रताय याचिके वेली सुनावणी बेगीन घेवपाचे निर्देश जारी करपाची मागणी केल्ली.
पूण सुनावणे उपरांत उच्च न्यायालयान स्पश्ट आदेश दिनासतना चोडणकार हांची याचिका निकालांत काडिल्ली. सर्वोच्च न्यायालयान दिल्ल्या निवाड्याचो संदर्भ दीत सभापतीपद हें लवाद आशिल्ल्यान न्यायालय हस्तक्षेप करूंक शकनाशिल्ल्याचें निरिक्षण लेगीत उच्च न्यायालयान नोंदयिल्लें. ताका लागून चोडणकार हाचे आड सर्वोच्च न्यायालयांत गेल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
