भांगरभूंय | प्रतिनिधी
एकदां संकश्ट आयलें काय एका फाटोफाट एक येत रावता. गोंयांत जानेवारीचे सुरवेक पयल्या चार दिसांनी फाटोफाट अपघात जावन चार तरणाट्यांक मरण आयिल्लें. स्मार्ट सिटीच्या कामानूय एक बळी घेतिल्लो. आतां परतून एप्रीलांत हें मरणाचें सत्र चालू जालां. फाटोफाट अपघात जायत आसात, मनीस मरत आसात. फाटल्या 16 दिसांनी अपघात जावन 20 जाणांक मरण आयलां. गोंयचे समाजीक नदरेन ही वायट गजाल. हे फावट कांय पर्यटकूय अपघातांत सांपडल्यात. तर कांय लोक तांची कसलीच चूक नासतना संवसाराक अंतरल्यात. गाडयो वाडल्यात, रस्ते इबाडल्यात, चलोवपी नेम पाळिनात हीं कारणां आसात, पूण आनीक एक कारण येरादारी पुलिसांचे मोहिमेंत उक्तडार आयलां. ते विशीं सगल्यांक खबर आशिल्लेंच, पूण आतां अधिकृतपणान तें कारण सामकार आयलां.
सोरो पियेवन गाडी चलोवपी ड्रायव्हरांच्या आड येरादारी पुलिसांनी सोमारा सांजवेळा राज्यभर विशेश मोहीम चालीक लायली. फक्त 3- 4 वरां. हातूंत कितले ड्रायव्हर सांपडचे? 35. भितर एका कदंब बस ड्रायव्हराचोय आस्पाव आसा. भौशीक गाडयेच्या ड्रायव्हराच्या हातांत प्रवाशांचो जीव आसता. ताका लागून बस, रेल्वे, विमान चलोवप्यांनी कायम सादूर रावचें आसता. ते मात पसून दुयेंत आसूंक फावनात. जागरणां उपकारनात. पूण भौशीक बशींनी ड्रायव्हराची परिस्थिती कितें आसता, तें कॅबिनांत बसप्यांक खबर आसतलीच. कायदो परवानगी दिना, पूण कॅबिनांत दोन तरी प्रवासी बशिल्ले आसतातूच. कान्सा – थिये ट्रकाच्या धपक्यान स्कूटर चलोवपी चलयेक मरण आयलें आनी दुबावीत ट्रक ड्रायव्हर सांपडलो तेन्ना तो पियेल्लो आशिल्लो. चुकीचे दिशेन वचून ताणें हो अपघात केलो. उपरांत पुलिसांनी ही मोहीम चालीक लायली. खास करून अवजड गाडयांचेर लक्ष केंद्रीत केलें. तातूंत सोरो पियेवन गाडी चलोवपी मेळ्ळे. तांचेर गुन्यांव दाखल केल्यातूच, पूण तांच्यो गाडयोय जप्त केल्यात. एकदम बरी गजाल. तांकां न्यायालया मुखार उबे करतात. दंड आनी सादी बंदखण दितात. ड्रायव्हींग लायसन्सूय निलंबीत करपाची शिफारस न्यायालय करता.
गोंय पुलीस खात्यान अल्कोमिटरांचो आंकडो वाडोवपाक जाय. म्हणटकच ड्रायव्हरांक तपासप सोंपें जातलें. ही मोहीम खास करून शेनवार आनी आयतारा सांजेच्या वेळार आनी रातीं बारा उपरांत राज्यभर चलयल्यार चड बरें जातलें… आनी फक्त अवजड वाहनांच कित्याक? दुचाकी, तीनचाकी, चारचाकी गाडयोय तपासच्यो. गोंय हें पर्यटन राज्य. कोणे इल्लें पेटयलें म्हूण कितें जाता, ही मानसिकताय दुसऱ्यांचो जीव घेवपाक शकता. बऱ्याच ड्रायव्हरांक पार्टेची मजा घेतना आपूण रातचो परत गाडी चलयत घरा वचपाचो आसा, हाचें भान उरना. वांगडा आपली बायल, भुरगीं आसात, ताचोय ताका विसर पडटा. मागीर ताची भाणस्तारी जाता.
हालीं जाल्ल्या अपघातांचो नियाळ घेतल्यार तातूंतल्या अर्द्या अपघातांनी ड्रायव्हर पियेल्लो आशिल्लो, हें दिसतलें. पुलीस सगलीच म्हायती जाहीर करिनात. पूण अपघातांची आंकडेवारी येता, तेन्ना कितले जाण पियेल्ले आशिल्ले तें कळटा. सोऱ्याचो एक घोंट, ताचो स्वताचो आनी दुसऱ्याचो घात करपाक शकता, हें अपघातांनी सिद्ध केलां.
भौशीक येरादारी सुरळीत जायत, बशींचो आंकडो वाडत, त्यो भरंवशाच्यो जायत जाल्यार स्वताच्यो गाडयो घेवन भायर भोंवपी लोक उणे जातले. सरकारी यंत्रणेन भौशीक येरादारी कडेन लक्ष दिवचें. शाॅर्टकट मार्ग रुंद करचे. गाडी चलोवप्यान सोऱ्याचें वेसन आसल्यार ताचेर नियंत्रण दवरूंक जाय. हालींच्या तेंपार खोस आसूं वा दुख्ख, पेगार पेग घेवपाची कांय बेबद्यांक संवयूच लागिल्ली पळोवपाक मेळटा. थोड्यांक सोरो पियेना जाल्यार तकली दुखप, आंग फोडप. थरथर सुटप असलें कितें तरी जाता. थोडे फुकटचो मेळटा म्हूण पियेतात. आतां पुलिसां कडेनूच न्हय, तर भौशीक जाग्यांचेर, खाजगी, सरकारी कार्यालयांनी अल्कोमिटर दवरपाचो वेळ आयला. लकणी येवप, फाजील आत्मविस्वास आसप, गोरवां, सुणीं मदीं येवप, मोबायल फोनाचेर नदर आसप, गर्लफ्रेंड वा इश्टाक कुशीक बसोवन गजालींच्या नेटार गाडी चलोवप…. हीं अपघातांचीं कांय कारणां. रस्तेय इबाडल्यात. कांय कडेन लायटी नात, सायन बोर्ड नात. थोडे अनवळखी जाग्यार वेगान गाडी चलयतात. तांकांय अपघात जातात.
एकदां अपघाती मरणां चालू जालीं काय तीं बंद जावपाचें नांव घेनात. हे अपघात आतां गाडयेकार आनी सरकारी यंत्रणांनीय गंभीरपणान घेवचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
