भांगरभूंय | प्रतिनिधी
अ पघाताचीं कारणां हजार. इबाडिल्ले रस्ते, गाडयांचो वाडिल्लो आंकडो, बेशिस्त, मस्ते, आबूज, अतिशाणे ड्रायव्हर, येरादारीची कोंयडी….! पेडण्यां फाटल्या दोन दिसांनी दोन अपघात जावन दुचाकी चलोवप्यांक मरण आयलें. पयर धारगळे, तर काल कासारवर्ण्यां. तकलेक हेल्मेट आसतना ह्या अपघातांनी मरण आयलां. अंदूं 53 दिसांनी 50 लोकांक मरण आयलां. अर्थांत आतां आंकडो वाडला आसतलो. गोंयांत वर्साक सुमार 300 लोक मरतात… आनी हातूंतले चडशे तरणाटे आसतात. फाटल्या 40 वर्सांचो नियाळ घेतल्यार दरेका वाड्यार एकलो तरी अपघात जावन गेला आसतलो वा दिव्यांग जाला आसतलो. हाचेर सरकार, जाणकारांक झुजा पांवड्यार उपाय घेवचे पडटले. तालांवाची रक्कम वाडोवप आनी येरादारी पुलीस उबे करप हो हाचे वयलो रामबाण उपाय थारपाक शकना, हें सिद्ध जालां. हे अपघात उणे करप खुद्द गाडी चलोवप्यांच्याच हातांत आसा.
गोंयांत चड अपघात जातात, ते दुचाकी चलोवप्यांचे. ताका लागून तांकां रुंद रस्त्यांचेर एक वेगळो ‘लेन’ दिवपाचें कांय वर्सां पयलीं थारिल्लें. थोड्या रस्त्यांचेर तशी पट्टी रंगोवन वाट तयार केल्ली दिसता. ती रस्त्याचे भायले वटेन आशिल्ल्यान तिचो वापर करपी चुकूनच दिसतात. बरेच दुचाकी चलोवपी मोटारी धांवतात, त्या मार्गाच्याय मदीं येतात. काय तरणाटे वेगान वाट मेळटा थंय दुचाकी घुसोवन मुखार वतात. गाडी चलोवप्यान शिस्त, नेम पाळपाक जाय, हेंच आमी विसरून वतात आनी मागीर अपघात. दुचाकी गाडयो हेर गाडयांक आडमेळीं करिनासतना थारावीक मार्गान गेल्यो जाल्यार अपघात उणे जावपाची शक्यताय आसा. दुसरी गजाल, येरादारीची कोंयडी. 20 मिणटां आडकून उरिल्लो गाडयेकार मागीर फुकट गेल्लो वेळ भरून काडपाक सदचे परस वेगान चलयता आनी अपघाताक जापसालदार थारता. कांय मार्गांचेर सदांच गाडयांची गचमुड्डी जाता. मात ताचेर उपाय काडप कोणाकूच शक्य जावंक ना. पर्वरे आतां स पदरी उड्डाण मार्ग बांदतले, तेन्ना कितें जातलें ते कोणाक खबर!!
भौशीक येरादारी बेभरंवशाची जाल्या, ताका लागून खाजगी गाडयांचो आंकडो हिस्पा भायर वाडला. रातच्या आठा उपरांत मडगांव, म्हापशें, कळंगूट मार्गा वयल्यो गाडयो सोडल्यो जाल्यार पणजेच्यान हेर कडेन वचपाक बसी नात. तें सोडात, दिसाच्यो तरी बसी सारक्यो आसतात? येरादारी खात्यान, कदंब म्हामंडळान मार्च 2020 त राज्यांतल्या रस्त्यांचेर कितल्यो बसी धांवताल्यो आनी आतां मार्च 2024 त कितल्यो धांवतात, हाचो अभ्यास केला? मुद्दाम करचो. खाजगी गाडयो तीन पटीन वाडिल्ल्याचें दिसतलें! पणजे बस स्टॅण्डा वयल्यान मिरामार वचपाक उणेंच अर्द वर लागता. मागीर लोक स्वताच्यो गाडयो कित्याक हाडचे नात? रेल्वेन शारां जोडिल्लीं जाल्यार आयज 15 लाखांच्या गोंयांत गोंयकारांच्यो 13 लाख गाडयो आसच्यो नासल्यो. अपघात उणे करपाक रेंट अ कॅब, म्हालवाहू वाहनांक ‘स्पीड गव्हर्नर’ बसोवपाची सुचोवणी परत एकदां येरादारी मंत्र्यान केल्या. पूण पयशे घेवन लेगीत फाटले फावट स्पीड गव्हर्नर बसोवंक नात, असो गंभीर आरोप ब्ल्यू टॅक्सी संघटणेन केला. तो बसयला अशें प्रमाणपत्र दिलें आनी ताच्या आदाराचेर येरादारी खात्यान फिटनेस प्रमाणपत्रूय दिलें खंय. ह्यो तीन एजन्सी आनी येरादारी अधिकाऱ्यां मदीं ‘बरेंपण’ आसा, असो आरोपूय तांणी केलो. येरादारी मंत्र्यान हाची खोलायेन चवकशी करची. गाडयांची स्पीड उणी जाली म्हूण अपघातांचेर नियंत्रण येतलेंच हाची खात्री ना. मुळांत म्हाल व्हरपी गाडयो वेगान वचनात. चडटेचेर त्यो हमखास बंद पडटात. ताका लागून येरादारी ठप्प जाता. ह्या गाडयांक फक्त रातचीं 8 ते सकाळीं 8 मेरेन येरादारी करपाची परवानगी दिली जाल्यार येरादारीक येवपी आडमेळीं पयस जातली. सरकारी कार्यालयांच्या वेळांनी थोडो बदल केल्यारूय रस्त्यां वयलें येरादारीचें वजें उणें जातलें. सरकारी सुटी वा सण- परबो आसतात, तेन्ना रस्ते रिकामी आसतात, ताचे वयल्यान वाचकांनी कितें तें समजुचें.
गोंयांतले अपघात हे खंयचेय परिस्थितींत कमी जावंक जाय. दुचाकीं खातीर वेगळी लेन करप, रस्त्याच्या कडांची उंचाय उणी करप, (गाडी भायर घेतल्यार वेतभर ते फूटभर खोल वता.) म्हाल व्हरपी वाहनांक रातचीच येरादारीची परवानगी दिवप, शाॅर्टकट मार्ग रुंद करप, रस्त्यांची परिस्थिती पळोवपाक घोळटे पंगड नेमप, येरादारीची कोंयडी जावची ना, हें पळोवप, कार्यालयांच्यो वेळो बदलप…. अशे कांय उपाय घेतल्यार अपघातांचेर इल्ले तरी नियंत्रण येतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
