अपघातांनी वाड: चवथीच्या काळांत घडिल्ले अपघात आनी मरणां

भांगरभूंय | प्रतिनिधी

पणजी : राज्यांत रस्तो अपघात घडतूच आसात. ह्या अपघातांनी मरण येवप्यांचेंय प्रमाण दिसान दीस वाडत आसा. आयिल्ले दिसा एक तरी अपघात आनी तातूंत मरण येवपाच्यो घडणुको घडटात. ह्याच चवथीच्या काळांत पांच अपघातांच्यो घडणुको घडल्यो आनी हातूंत ७ जाणांक मरण जाल्यार ६ जाण जखमी जाले.

• मांद्र्यां १४ वेर जाल्ल्या भिरांकूळ अपघातांत मांद्रेंची नणंद, भावजयेक जाग्यारूच मरण आयिल्लें. जाल्यार प्रियंका खर्बे हांची भयण सिद्धी शेटकार गंभीर जखमी जाल्ली. जीएमसींत उपचारा वेळार सिद्धीक मरण आयलें. एकाच कुटुंबांतल्या तिगांकूय मरण आयिल्ल्यान खर्बे आनी शेटकार कुटुंबाचेर दुख्खाची सया पातळ्ळ्या.
• सांकवाळे काल बस आनी दोन चाकी मदीं जाल्ल्या अपघातांत स्कुटरी फाटल्यान बशिल्ल्या पियेदाद दोरादो (४५) हाका मरण आयलें. मुखार आयिल्ले म्हायती प्रमाण, सोमारा शिंदोळे, सांकवाळेचें डोराडो कुटुंबीय आपले दुचाकीन उपासनगर-सांकवाळे पावलें तेन्ना एके खाजगी बसीन तांकां फाटल्यानच्यान धपको दिलो. हातूंत दुचाकीचेर आशिल्ले आंतोनियो दोरादो (५४), पियेदाद दोरादो (४५) आनी तांचो १२ वर्सां पिरायेचो पूत जॉय हीं रस्त्यार पडलीं. हातूंत पियेदाद हांकां हॉस्पिटलांत व्हेलो तेन्ना डॉक्टरांनी तांकां मरण आयिल्ल्याचें सांगलें. जाल्यार आंतोनियो आनी जॉय हांची भलायकी थीर आसा अशी म्हायती मेळ्ळ्या. हे विशीं अपघाताक कारण थारिल्लो बसचालक रामचंद्र शिंदे हाका वेर्णें पुलिसांनी ताब्यांत घेतला.
• गांजे-उसगांवां अनवळखी गाडयेचो धपको बसून बाबल गणपत गावडे (२१, आंबेली – सत्तरी) हो दुचाकी चलोवपी गंभीर जखमी जालो. ह्या प्रकरणांत फोंडें पुलिसांनी सोमारा रातीं अनवळखी वाहन चालकाचेर गुन्यांव नोंद केलो. ११ सप्टेंबराक हिट अँड रन हो अपघात जाल्लो. अपघातांत गंभीर जखमी जाल्लो स्कुटर चलोवपी बाबल हाचेर जीएमसींत उपचार सुरू आसात. फोंडें पुलीस अनवळखी गाडयेचो सोद घेतात.
• पेठवाडो नानोड्यां व्हॅली मिडोज लागसारच्या ओल्ताचेर मारुती सीआयझॅड आनी दुचाकी हांचो आमकारा- सामकारां जाल्ल्या भिरांकूळ अपघातांत कानोळकारवाडो, नानोडेंचे प्रतीक कानोळकार (२२) आनी वयलोवाडो नानोडेंचो लक्ष्मण मळीक (१९) हांकां आक्ताक मरण आयलें.