अपघातांचेर आळाबंद हाडपाकआतां भितरल्या रस्त्यांचें ऑडीट

भांगरभूंय | प्रतिनिधी

इलेक्ट्रॉनीक यंत्रणे वरवीं चलन दिवपाचेर भर

भांगरभूंय I प्रतिनिधी
पणजी : वाडट्या अपघातांचेर आळाबंद हाडपाक जिल्हो तशेंच भितरल्या रस्त्यांचें ऑडीट करपाचे निर्देश मुख्यमंत्री डॉ. प्रमोद सावंत हांणी भौशीक बांदकाम खात्याक दिल्यात. पुलिसां कडेन मनीसबळाचो उणाव आशिल्ल्यान इलेक्ट्रॉनीक यंत्रणे वरवीं चलन दिवपाचेर भर दिवचो, अशें बसकेंत थारले. येरादारी संचालक राजन सातार्डेकार हांणी ही म्हायती दिली.

राज्यांत अपघात जावपाच्यो घडणुको सुरूच आसात. तेच प्रमाण नेम मोडप्यांक तालांव दिवपाची मोहीम येरादारी पुलिसां कडल्यान सुरू आसा. येरादारी नेमांची कार्यवाही खर जाल्या, तरी लेगीत अपघात जायतूच आसात. बिरेस्तारा सकाळीं शेल्ड्यां जाल्ल्या भिरांकूळ अपघातांत एकल्याक मरण आयलें. अपघातांचें वाडटें प्रमाण अजून उणें जावंक ना. अपघातांक आळाबंद घालपा खातीर येरादारी खातें तशेंच पुलिसांचे यत्न सुरूच आसात. अपघातांचो नियाळ घेवन कार्यवाही करपा खातीर बसकांचें सत्र सुरू आसा.
चालकांच्या बेजापसालदारपणा सयत बाबत रस्ते लेगीत अपघाताक कारण थारतात. राष्ट्रीय म्हामार्गा सयत भितरल्या रस्त्यांचेर लेगीत अपघात घडटात. राज्य महामार्ग, जिल्हो मार्ग तशेंच गांवगिऱ्या वाठारांतल्या भितरल्या रस्त्यांचें ऑडीट करपाचे निर्देश भौशीक बांदकाम खात्याक दिल्यात. एके खाजगी एजन्सी वरवीं हें ऑडीट जातलें. राज्यांत आतां मेरेन भितरल्या रस्त्यांचें ऑडीट जावंक नाशिल्ले. पयलेच खेपे भितरल्या रस्त्यांचें ऑडीट जातले. हाका कळाव लागतलो. एजन्सीच्या नेमणुके खातीर निविदा जारी जातली. एजन्सी निश्चीत जाले उपरांत काम सुरू जातलें. चडशे अपघात राष्ट्रीय म्हामार्गाचेर जातात. तरी भितरल्या रस्त्यांचेर जावपी अपघातांचें प्रमाण सामकें उणें ना. घाताचीं मोडणां, अशीर रस्ते तशेंच अपघात प्रवण वाठाराची म्हायती ऑडिटा वरवीं मेळटली. जिल्हो तशेंच भितरल्या रस्त्यांचे हॉटमिक्सींग जाता. रस्त्यांत मात बदल
जायना.
जानेवारी आनी फेब्रुवारी ह्या दोन म्हयन्यांत 415 अपघात जावन 61 जाणांक मरण आयलां. हें प्रमाण भिरांकूळ आसा. जानेवारी आनी फेब्रुवारी ह्या दोन म्हयन्यांत अपघाती मरणाचें प्रमाण 23 टक्के चड आसा. पुलीस महासंचालकांनीच ही म्हायती दिल्या.
पोरूं वर्सा (2022) 3,011 अपघातांनी 271 जाणांक मरण आयिल्लें. ह्या अपघातां मदीं 2,797 अपघात (92.89 टक्के) चालकांच्या घाळपणाक लागून जाल्ले. तशेंच 3,011 अपघातां मदी 1,268 अपघात (42.11 टक्के) हे दुचाकींचे आसात. येरादारी पुलिसां कडल्यान ही म्हायती मेळ्ळ्या.
येरादारी खातें, येरादारी पुलीस तशेंच भौशीक बांदकाम खातें हांची अपघातांचेर सप्तकांतल्यान एकदा नियाळ बसका जाता.

नेमाचे कार्यवाही खातीर इलेक्ट्रॉनीक यंत्रणेचो वापर
येरादारी नेमांची कार्यवाही सध्या येरादारी पुलिसां वरवीं जाता. नेमाच्या कार्यवाही खातीर मोट्या प्रमाणांत मनीसबळ लागता. मनीसबळ उणे करपा खातीर चलन दिवपाक इलेक्ट्रॉनीक यंत्रणेचो वापर जातलो. इलेक्ट्रॉनीक यंत्रणेचेर भर दिवपाचे निर्देश मुख्यमंत्री डॉ. प्रमोद सावंत हांणी दिल्यात. मुखेल रस्त्यांचेर आनी म्हत्वाच्या सुवातांचेर सीसीटिव्ही कॅमेरे बसयतलें. येरादारी नेमांचीं उल्लंघनां कॅमेऱ्यांत ट्रॅप जातली. कॅमेऱ्याच्या आदारान वाहन चालकांक तालांव दितले. हॅल्मेटाचो तालांव लेगीत कॅमेऱ्याच्या आदारान दितले. रस्त्याच्या सगल्या वाठारांनी येरादारी पुलीस दवरप शक्य जाय ना. कांय कडेन कॅमेरे तशेंच इलेक्ट्रॉनीक यंत्रणेच्या आदारान येरादारी नेमांची कार्यवाही जातली. इंटरसेप्टर वाहनां आयले उपरांत ओव्हरटेक करपी वाहनांक दंड दिवप शक्य जातलें.