भांगरभूंय | प्रतिनिधी
नाजाल्यार 8 मार्चाक रास्ता रोको; गोंयची टेंपो, लॉरी धनी संघटणेची शिटकावणी
फोंडें: अनमोडा राष्ट्रीय म्हामार्गा वयल्यान सुरू आशिल्ली सगली येरादारी बेकायदो आसून कारवार उपजिल्होधिकाऱ्यान सगले तरेची येरादारी सुरू करपाचो नवो आदेश 7 मार्च मेरेन दिवचो. नाजाल्यार गोंय आनी कर्नाटक राज्यांतले ट्रक धनी 8 मार्च दिसा अनमोड शिमेर रास्ता रोको करतले अशी शिटकावणी बुधवारा आमची गोंयची टेंपो, लॉरी धनी संघटणा आनी खानापूर ट्रक धनी संघटणेन दिल्या.
अनमोड शिमेर बुधवारा सकाळीं आमची गोंयची टेंपो, लॉरी धनी संघटणा आनी खानापूर ट्रक धनी संघटणेच्या पदाधिकाऱ्यांची खाशेली बसका जाली. फाटल्या कितल्याशाच म्हयन्यां सावन निवेदन दिवन आमी थकिल्ल्यान ट्रक धनयांनी रास्ता रोको करपाचो निर्णय घेतला.
ह्या वेळार आमची गोंयची टेंपो आनी लॉरी धनी संघटणेचे श्रीकांत च्यारी, एम.के.नायडू, श्यामराव वडार, शब्बीर अन्सारी, सचीव अनुराग च्यारी जाल्यार खानापूर ट्रक धनी संघटणेचे विजय साळुंके, राजाराम नाईक आनी हेर ट्रक धनी हाजीर आशिल्ले.
अनमोड ते रामनगर मेरेनच्या राष्ट्रीय म्हामार्गाच्या रस्त्याचें काम सुरू करपा खातीर 2018 वर्सा कारवार उपजिल्होधिकाऱ्यान सगले तरेची येरादारी बंद करपाचो आदेश दिल्लो. पूण एका वर्सांत पुराय जावपाचें काम पांच वर्सां जालीं तरी अजून पुराय जाल्लें ना. पूण लिपचोरयां पद्दतीन अवजड वाहनांची येरादारी ह्या मार्गा वयल्यान सुरू आसून ताचो परिणाम 10 टायर परस चड वाहन धनयांचेर जाता.
अनमोड घाटांतल्यान 10 टायरा परस चड टायर आशिल्लीं वाहनां सोडिनाशिल्ल्यान ट्रक धनयांक सुमार 6 ते 7 हजार रुपया चड डिझॅला खातीर खर्च करून येरादारी कारवारचे दिशेन करची पडटा. ट्रक धनयांनी कारवार आनी हेर सरकारी खात्याच्या अधिकाऱ्यांक निवेदन दिवन अवजड येरादारी सुरू करपाची मागणी केल्ली. पूण कर्नाटकांतल्या सरकारी अधिकाऱ्यांनी आडनदर केल्ल्यान ट्रक धनयांक अर्थीक लुकसाण सोंसचें पडटा.
हे संबंदी अदीक म्हायती दितना श्रीकांत च्यारी हांणी अनमोड घांटांतल्यान सद्या बेकायदो येरादारी सुरू आसून 10 परस चड टायराची वाहनां लेगीत पयशे घेवन सोडटात. पूण गोंय आनी खानापूर वाठारांतल्या ट्रक धनयांची अवजड वाहनां सोडिनाशिल्ल्यान उपजिल्होधिकाऱ्यान नवो आदेश काडपाची गरज आसा. कारण रस्त्याचें कांय कडेन उरिल्लें काम फुडल्या 10 वर्सांत लेगीत सोंपचें ना. कारवारच्या अधिकाऱ्यांनी 7 मार्च मेरेन आदेश काडलो ना जाल्यार ट्रक धनी 8 मार्च दिसा अनमोड घांटांतले शिमेर रास्ता रोको करतले अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
