भांगरभूंय | प्रतिनिधी
गोवा कोंकणी अकादेमी ‘अनन्य’ ही ‘स’ म्हयनाळी साहित्य पत्रिका उजवाडाक हाडटा. ह्या पत्रिकेचो सतरावो- अठरावो’ अंक (जुलय 2022 – जून 2023), 4 फेब्रुवारी 2024 ह्या कोंकणी राजभास दिसाच्या म्हुर्तार उज़वाडाक आयला. ‘अनन्य’ ही साहित्य पत्रिका ‘गोवा कोंकणी अकादेमी’चो एक भोव तोखणायेचो उपक्रम जावन आसा.
ह्या अंकात संशोधनाचेर भर दिला आनी ताचे संबंदी साबार लेख आसपावल्यात. ‘चौकेर’ ह्या साहित्यिकांच्या मुलाखतीच्या सदरांत नामनेचे लेखक आनी 2023 वर्साचे साहित्य अकादेमी जैतवंत डॉ. प्रकाश पर्येंकार हांची गोपिनाथ गांवस हांणी मुलाखत घेतल्या. ह्या मुलाखतींतल्यान प्रकाशबाबांचे साहित्यीक प्रवासाचो वेध घेवपाचो गोपिनाथबाबांचो येत्न तोखणायेचो. गोपिनाथबाबान विचारिल्ल्या प्रस्नाक समर्पक अश्यो जापो दिवन प्रकाशबाबान आपल्या साहित्यीक जिणेचो पट वाचप्यां मुखार दवरला.
हांवें वयर म्हळां तशें ह्या अंकात संशोधनाचेर भर दिला. ‘मंथन’ ह्या संशोधनाचेर आदारिल्ल्या सदरांत वट्ट 17 संशोधनपर लेख आसपावल्यात. हे लेख विंगड-विंगड विशयांचेर आसपावल्यात. पूण कांय कडेन विशयांची पुनारावृत्ती जाल्या. ते खातीर संशोधकांक विशय आदींच विशय दिवन लेख बरोवन घेवप गरजेचें. तरीपूण 17 संशोधनपर लेख एकाच अंकात येवप हो आयज मेरेनचो रिकोर्ड आसतलो. हो ट्रेंड असोच चालू उरतलो ही आस्त. हाचे पैलीं गोंय विद्यापिठाच्या कोंकणी विभागान ‘सासाय’ हो संशोधनपर अंक काडिल्लो. ताचो पयलो अंक आयज लेगीत पळोवंक मेळना. आनी ताचें फ़ूडें कितें जालें हो मोट्या संशोधनाचो विशय. ते मानान ‘अनन्यां’ त इतले संशोधनपर लेख येवंक पावले म्हण संपादक वसंत भगवंत सावंत तोखणायेक पात्र थारतात.
‘कथामंच’ ह्या कथेक ओंपिल्ल्या सदरांत डॉ. हेमंत अय्या, कुमूद भिकू नायक, संदेश श्रीकांत बांदेकार, किशू बारकूर आनी जोफ़ा गोन्साल्वीस हांच्यो कथा आसात. ते भायर रमेश लाड हांची अणकारीत कथा आसा. आनी त्यो सगळ्यो वाचनीय जाल्यात. अजाप म्हळ्यार ह्या फ़ावट कवितेक ह्या अंकांत सुवात दिवंक ना.
254 पानां आशिल्ल्या ह्या अंकाचे मुखचित्र आनी फ़ाटलें चित्र गीतेश शिंदे, मोहीत कमलेश वर्मा हांची आसात. हांची आसात आनी तीं ह्या अंकाची सोबाय वाडयतात.
ह्या अंकाचें संपादन अकादेमीचे प्रभारी अध्यक्ष वसंत भगवंत सावंत हांणी केलां. पुराय अंक सामको वाचनीय जाला, त्या खातीर संपादक वसंत भगवंत सावंत आनी संपादक मंडळाचे वांगडी मेघना शेटगांवकार (सचीव), गोपिनाथ गांवस आनी दत्तराज नायक हांकां परबीं.
‘अनन्य’: स म्हयनाळी साहित्य पत्रिका (जुलय 2022 – जून 2023))
प्रकाशक: सचिव, गोवा कोंकणी अकादेमी, पणजी
पानां: 254, मोल: 80 रुपया
सखाराम शेणवी बोरकार
9923306751
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
