भांगरभूंय | प्रतिनिधी
गोंय इंटरनॅशनल ट्रॅव्हल मार्ट 2 ते 4 एप्रील मेरेन
पणजी ः गोंय पर्यटन खाते 2 ते 4 एप्रील मजगतीं गोंय इंनटरनॅशनल ट्रॅव्हल मार्ट हें प्रदर्शन घडोवन हाडटलें. ह्या प्रदर्शनांत गोंय अध्यात्म पर्यटन आनी दर्यादेगे पलतडच्या गांवगिऱ्या वाठारांतल्या पर्यटनांचेर चड लक्ष दितले, अशें पर्यटन संचालक सुनिल अन्चिपाका हांणी सांगलें.
2019 उपरांत कोविड सोंपोवन पर्यटन खाते जीआयटीएमची चवथी आवृती बांबोळेच्या श्यामाप्रसाद मुखर्जी स्टेडियमाचेर घडोवन हाडटा. गोंयची ही सगळ्यांत व्हडली पर्यटन आनी वेवसाय क्षेत्रांतली कार्यावळ आसतली. गोंयच्या शिगम्या सारकिल्ले राज्याचे सण आमी आंतराष्ट्रीय गिरायक आनी विक्रेत्यां मुखार मांडटले, अशें संचालकान सांगलें.
संवसारभरांतले आंतराष्ट्रीय पर्यटन मळा वयले वेवसायीक आपल्यो वस्तु आनी सेवा जीआयटीएमाच्या प्रदर्शनांत मांडटले. हातूंत गोंयचे तशें देशी पर्यटन वेवसायिकांचो आस्पाव आसतलो. आता मेरेन 250 परस चड आंतरराष्ट्रीय आनी गोंयचे भागधारक टीटीएजी आनी हाॅटेलांनी नोंदणी केल्या. 70 स्टॉल्स बुक जाल्यात, अशे अन्चिपाका हांणी सांगलें.
अध्यात्म पर्यटनां खातीर एकादशी तीर्थ
गोंयचे संस्कृतीक पालव दितना थळाव्या लोकांक तिचो फायदो जावचो आनी ती तिगून उरची म्हूण ‘एकादशी तीर्थ’ ही संकल्पना अध्यात्मिक पर्यटना खातीर चालीक लायल्या. अध्यात्मिक पर्यटना खाला आमी 11 देवळांची निवड केल्या. थळाव्यां लोकांक फायदो जावचो म्हूण ह्या देवळांनी तांकां आस्पावन घेतले. थळाव्यांक बरोबर घेतल्यार संस्कृतीचे जतन जातलें. हो हेतू मुखार दवरून आमी एकादशी तीर्थ संकल्पना घडयल्या. कांय कृती आराखडे तयार केल्यात, अशें श्री. अन्चिपाका हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.