अतिरिक्त शुल्क घेवपी अनुदानीत शिक्षण संस्थांचेर जातली खर कारवाय : मुख्यमंत्री

भांगरभूंय | प्रतिनिधी

० शिक्षण वाठारांतल्या भरती नेमात जातलो बदल

० अंदू यत्ता णववेक एनईपी लागू करपाचे यत्न

० 78 मदल्या 41 सरकारी विद्यालयांचो 100 टक्के निकाल

० पालकांनी भुरग्यांक सरकारी शाळांनी घालचें

पणजी, प्रतिनिधीः अतिरिक्त शुल्क घेवपी अनुदानीत शिक्षण संस्थांचेर खर कारवाय जातली, अशी शिटकावणी मुख्यमंत्री डॉ. प्रमोद सावंत हांणी दिल्या. लॅब टेक्नीशियना सयत शिक्षण वाठारांतल्या पदां खातीरच्या भरती नेमात बदल करपाचो विचार आसा. अंदू यत्ता णववेक राष्ट्रीय शिक्षण धोरण (एनईपी) लागू करपाचे सरकाराचे यत्न आसा अशें डॉ. सावंत हांणी सांगलें. तशेंच पालकांनी भुरग्यांक सरकारी शाळांनी घालचें असो उलोय मारलो.
डॉ. सावंत हांणी बिरेस्तारा पर्वरी मंत्रालयांत पत्रकार परिशद घेतली. ह्या वेळार शिक्षण सचिव प्रसाद लोलयेंकार, शिक्षण संचालक शैलेश झिंगडे, एससीईआरटीची संचालक मेघना शेटगांवकार, शंभू घाडी, सिंधू प्रभुदेसाय, पॉल फर्नांडिस आनी हेर अधिकारी हाजीर आशिल्ले.
कांय अनुदानित शाळा विद्यार्थ्यां कडल्यान अतिरिक्त शुल्क घेतात. सरकारा कडल्यान अनुदानित संस्थांक देखभाल तशेंच हेर सुविधां खातीर अनुदान मेळटा. अतिरिक्त शुल्क घेवप हो गैरवेवहार. कसलेंय कारण सांगून अतिरिक्त शुल्क घेवपी संस्थांचेर सरकार खर कारवाय करतलें. विद्यालयांनी शिक्षकांचो उणाव ना. शिक्षकांक प्रशिक्षण दिवपाचो वावर सुरू जाला. सरकारी विद्यालयांनी अनुदानित विद्यालयांच्या तुळेंत सुमार दर्जाचे विद्यार्थी शिकतात. शिक्षकांच्या यत्नाक लागून निकाल बरो लागला. 100 टक्के निकाल लागील्ल्या विद्यालयांच्या मुख्याध्यापकांचो भोवमान जातलो, अशेंय डॉ. सावंत हांणी सांगलें.

भरती नेमात जातलो बदल

शिक्षण मळा वयली भरती पोरण्या नेमा प्रमाण जाता. भरती नेमात बदल करपाचो विचार सरकार करता. लॅब टेक्नीशियन पदा खातीर विज्ञान शाखेच्या पदवीधरांचीच भरती जातली, अशें तांणी सांगलें.

अंदूं यत्ता णववेक एनईपी लागू करपाचे यत्न

अंदू यत्ता णववेक राष्ट्रीय शिक्षण धोरण लागू करपाचे यत्न आसा, अशें तांणी सांगलें. राष्ट्रीय शिक्षण धोरणाच्या तयारीचो नियाळ घेवपा खातीर फाल्यां शुक्रारा बसका जातली, अशी म्हायती प्रसाद लोलयेकार हांणी दिली.

41 सरकारी विद्यालयांचो 100 टक्के निकाल

राज्यांतल्या 78 सरकारी विद्यालयां मदल्या 41 विद्यालयांचो निकाल 100 टक्के लागला. सरकारी विद्यालयातल्या धावेच्या 1573 विद्यार्थ्यां मदल्या 1437 विद्यार्थी पास जालें, अशी म्हायती शैलेश झिंगडे हांणी दिली.