भांगरभूंय | प्रतिनिधी
पणजी, प्रतिनिधी : गांव, संस्कृती आनी दायज हाका अणकार तशेंच साहित्या वरवीं उर्बा दिवपाचें यत्न राजभास संचालनालयान सुरू केल्यात. संस्कृती आनी दायजाचेर आधारीत साहित्य रचनेक खासा अनुदान मेळटलें. ३० हजार ते ८५ हजारा मेरेन अनुदान दिवपाची तजवीज येवजणेंत आसा.
कोंकणी वा मराठींतल्यान (देवनागरी लिपी) पुस्तक बरोवपी वा इंग्लीश भाशेंतल्यान कोंकणी वा मराठींत अणकार करपी मनशाक हे येवजणेचो लाव मेळटलो. ही येवजण ३ वर्सां खातीर आसतली. राज्यांत १५ वर्सांचो राबितो आशिल्ल्या मनशांकूच हे येवजणेचो लाव मेळटलो. अर्जांचेर विचार करून निर्णय घेवपा खातीर राजभास संचालकांच्या फुडारपणा खाला तज्ज्ञ समिती स्थापन केल्या.
६० ते १०० पानांच्या पुस्तका खातीर (ए ४ आकार) ३० हजार ते ५० हजारा मेरेन अर्थीक मजत मेळटली. १०१ ते १५० पानांच्या पुस्तका खातीर ४० हजार ते ६५ हजारा मेरेन अर्थीक मजत मेळटली. १५१ ते २०० पानांच्या पुस्तका खातीर ५० हजार ते ७५ हजारा मेरेन अर्थीक मजत दिवपाची तजवीज येवजणेंत आसा. २०० पानां परस मोठ्या पुस्तका खातीर ६० हजार ते ८५ हजारां मेरेन अर्थीक मजत मेळटली.
अर्जाचो विचार करून ५० टक्के रक्कम पुस्तक उजवाडपा पयलीं संमत करपाचे अधिकार तज्ज्ञ समितीक आसा. तज्ज्ञ समितीचे वांगडी पुस्तक उजवाडाक येवचे पयलीं परीक्षण करतलें. परिक्षणा खातीरूय मानधन दिवपाची तजवीज हे येवजणेंत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
