भांगरभूंय | प्रतिनिधी
सुदिन ढवळीकार : 1200 कोटी खर्च करून जमनी पोंदच्यान केबल घालतले
मडगाव : राज्यांतली वीज समस्या सोडोवपाक 1200 कोटी रुपया खर्च करून उच्च दाबाचे केबल घालतले. तें काम पुराय जातकच राज्यांतले विजेचे प्रस्न ना जातले. उपरांत उपकेंद्रांची सुदारणा जातली. फुडल्या अडेज वर्सां उपरांत राज्यांतली वीज समस्या कायमची ना जातली, अशें वीज मंत्री सुदीन ढवळीकार हांणी सांगलें.
मडगांवांत पत्रकारां कडेन उलयतना श्री. ढवळीकार हांणी सांगलें, 1978 उपरांत राज्यांत काँग्रेस आयल्या. तांणी कितें केलें तें सांगात? वीज खातें हातांत घेतले उपरांत एका वर्सात ही समस्या सोडोवपा खातीर दक्षीण आनी उत्तर गोंयच्या वेगवेगळ्या वाठारांनी 1200 कोटी रुपया खर्च करून जमनी पोंदा वीज लायनी घालपाचें काम आमी हातांत घेतलां. तीं कामां सुरू करतात. राज्यांतल्या सगळ्या वाठारांनी उच्च दाबाचे वीज लायनी जमनी पोंदच्यान घालतले, त्या वेळार वीज समस्या 90 टक्क्यांनी उणी जातली. उण्या दाबाच्या वीज लायनींक लागून 10 टक्के वीज समस्या उरूंक शकता, अशें ढवळीकार हांणी सांगलें.
उपकेंद्रांनी सुदारणा जातली
कुंकळ्ळी वाठारांतली वीज समस्या सोडोवपा खातीर कुंकळ्ळी उपकेंद्राची सुदारणा करतले. काणकोण वाठारांत 200 कोटी उच्च दाबाच्या भूंयगत वीज मार्गाचें काम करपाचे आसात. ते उपरांत ज्या सुवातेर चड उपकेंद्रांची गरज आसा थंय उपकेंद्रां स्थापन करतले. साळगांव उपकेंद्रा खातीर 200 कोटी रुपयांची निविदा फुडल्या कांय म्हयन्यांत काडतले. फुडल्या अडेज वर्सांत दक्षिण गोंयांतली वीज समस्या ना जातली. जायत्या उपकेंद्रांक कुंपण लेगीत ना तें बांदपा खातीर दोन सप्तकांत निविदा काडतले. हाचे भायर जमनी पोंदा वीज लायनी पुराय जातकच रस्त्या कुशीकच्या उक्त्या पॅनलांचोय प्रस्न ना जातलो अशें वीज मंत्री ढवळीकार हांणी स्पश्ट केलें.
जायत्यो वीज लायनी 58 वर्सां पोरण्यो
राज्यांत 1965 वर्सा वीज लायनी घाल्यो. ते उपरांत कोणेंच ह्यो वीज लायनी बदलपाचो यत्न केल्लो ना. मडगांव, पणजी, म्हापसा शारांतल्या कांय वाठारांनी आनी वीज समस्या निर्माण जाल्ल्या सुवातींनी वीज लायनी बदलल्यो. पूण गांवांनी वीज लायनी बदलपाचेर कोणेंच लक्ष दिवंक ना. तशेंच कंडक्टर आनी वीज लायनी आसात तशेंच आशिल्ल्याचे वीज मंत्री सुदीन ढवळीकार हांणी सांगलें.
2030 वर्सा मेरेन 50 मेगावॅट उत्पादनाचें ध्येय
सध्या गोंयांत वीज निर्मिती जायना. 1965 सावन गोंयांत वीज तयार करपा खातीर खंयच्याच राज्य सरकारान कसलीच पावलां उबारूंक नात. आतां मुख्यमंत्री डॉ. प्रमोद सावंत हांच्या फुडारपणा खाला आनी केंद्र सरकाराच्या सहकारान राज्यांत वीज तयार करपाचे यत्न सुरू आसात. सौर वीज निर्मिती आनी हेर वीज निर्मिती प्रकल्पांतल्यान 2030 मेरेन 50 मेगावॅट वीज निर्मिती करपाचे ध्येय आसा. गोंयांतच वीज तयार जातली अशें वीज मंत्री ढवळीकार हांणीं स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
