अडुळशें – बोरये घराचेर झाड पडून 4 जखमी
भांगरभूंय | प्रतिनिधी
3 ल्हान भुरग्यांक घरा भायर काडिल्ल्यान दुर्घटना टळ्ळी
सांखळी न्हावेली चक्रवादळान 15 लाखाचें लुकसाण; सत्तरे पडझड
फोंडें: अडुळशें – बोरये बिरेस्तारा रातीं 7.30 वरांच्या सुमाराक आंब्याचें झाड पडून 4 जाण जखमी जावपाची घडणूक घडली. झाड पडपाचो आवाज आयिल्ल्यान 3 ल्हान भुरग्यांक घरा भायर काडिल्ल्यान दुर्घटना टळ्ळी. हे घडणुकेन 6 ते 7 लाख रुपया परस अदीक लुकसाण जालां, उटंगाराच्या पावसाक लागून खूबशे कडेन झाडां रस्त्यार पडपाचे प्रकार घडले. फोंडें उजो पालोवपी दळाच्या जवानांनी विवीध सुवातांनी वचून झाडां कुशीक काडलीं.
मेळिल्ले म्हायती प्रमाण रातीं वाऱ्या सयत पडिल्ल्या पावसांत आंब्याचें झाड खुमणो सतरकार हांच्या घरार पडलें. पावस पडत आसतना झाड पडपाचो आवाज आयलो तेन्ना खुमणो सतरकार हांणी बोवाळ करून घरांतल्या सगल्यांक भायर वचपाचो सल्लो दिलो. त्या वेळार तीन ल्हान भुरग्यांक सुखरुप भायर काडलीं. पूण घरांतल्यान भायर सरतना नळे उसळून पडिल्ल्यान 4 जाण जखमी जाले. जखमीक शिरोडेंच्या मुळाव्या भलायकी केंद्रांत दाखल करून उपचार केले. शुक्रारा सकाळीं फोंडें उजो पालोवपी दळाच्या जवानांनी वचून झाड कुशीक काडले.
घराचेर झाड पडून खुमणो सतरकार (41), तेजस्वी सतरकार (40), सरिता सतरकार (31) आनी धा वर्सां पिरायेचें सलोनी सतरकार हीं जखमी जालीं. फाटल्या कांय वर्सां सावन हें आंब्याचें झाड घातक स्थितींत आशिल्लें. ते संबंदी थळावे पंचायतीक म्हायती दिल्ली. पूण झाड मारपा खातीर लागपी खर्च चड येत आशिल्ल्यान झाड तशेंच दवरलें.
सांखळी – न्हावेले चक्रवादळ
सांखळी मतदारसंघांतल्या न्हावेली पंचायत वाठारांतल्या खूबशा गांवांनी बिरेस्तारा रातीं चक्रवादळाचो फटको बशिल्ल्यान खूबशा घरांचें, बागायतींचें व्हड प्रमाणांत लुकसाण जालें. सुमार 15 लाखाचें लुकसाण जाल्ल्याचो अदमास उक्तायतात.
न्हावेली, फणस वाडो, भरोणी वाडो, पावलार, कासरवादा, मायणी, बेताल मंदीर, दुरीग वाडो, घाडी वाडो, फाळ वाडो आदीं सुवातांनी वादळाचो फटको बशिल्ल्यान व्हड लुकसाण जालें.
दिवचल, वाळपय, पोरणें गोंय, फोंडें हांगा सावन चार उजो पालोवपी दळाचे बंब आनी जवान बिरेस्तारा रातीं सावन शुक्रारा सांजवेळ मेरेन मजत कार्यांत गुथिल्ले.
खूबशे कडेन झाडां पडिल्ल्यान सुमार सात ते धा घरांच्या पाख्याचें व्हड प्रमाणांत लुकसाण जालें. तशेंच सुमार आठ ते धा बागायतदारांचें मोटें लुकसाण जालें.
मजगतीं, मुख्यमंत्री डॉ. प्रमोद सावंत हांकां घडणुकेची म्हायती मेळटकच आपत्कालीन यंत्रणा, उजो पालोवपी दळ, उपजिल्होधिकारी, मामलेदार, कृशी अधिकारी हांचे वतीन मजत कार्य तशेंच लुकसाणीचो अहवाल तयार करपाचे आदेश दिले.
उपजिल्हाधिकारी रमेश गांवकार, मामलेदार विमोद दलाल हांणी ताकतिकेन पंगड धाडून मजत कार्य तशेंच लुकसाणेचो नियाळ घेवपाचे आदेश दिले.
सत्तरे झाडां पडपाच्यो स घडणुको
बिरेस्तारा एका दिसांत सत्तरी म्हालांतल्या खूबशा वाठारांनी झाडां पडपाच्यो स घडणुको घडल्यो. वाळपय उजो पालोवपी दळाच्या जवानांनी बिरेस्तारा रातीं उसरां मेरेन सगल्यो आडमेळीं पयस करपाचेर भर दिलो. शुक्रारा सकाळ मेरेन सगल्यो आडमेळी पयस केल्यो.
कोपाड्ड्यां एका राखणे वण्टीचेर आंब्याचें झाड पडिल्ल्यान राखणे वण्टीचें व्हड प्रमाणांत लुकसाण जालें. पूण सुदैवान कसलीच जिवीतहानी जावंक ना.
बेतकेकारवाड्यार रस्त्यार झाड पिडल्ल्यान कांय प्रमाणांत येरादारीक आडमेळीं आयली. पूण उजो पालोवपी दळाच्या जवानांनी रोखडीच धांव घेवन झाड कुशीक काडून रस्तो मेकळो केलो.
नाणूस वाठारांत वीज वाहिन्याचेर पणसाचें झाड पडिल्ल्यान वीज वाहिन्यो तुटल्यो. हाका लागून संबंदीत वाठारांत वीज पुरवण खंडीत जावपाचो प्रकार घडलो. दळाच्या जवानांनी वाहिनी वेलें झाड काडिल्ल्यान वीज पुरवण रातीं उसरां सुरू जाली.
वाळपय नगरपालिका वाठारांतल्या बेनार्ड कॉम्प्लेक्सांतली अचकीत वीज पुरवण खंडीत जाल्ल्यान चार जाण लिफ्टींत आडकले. निमाणें तांकां उजो पालोवपी दळाच्या जवानांनी ही लिफ्ट मॅन्युअल पद्दतीन हाताळून तांकां सुखरूप भायर काडले.
झर्म्यां विश्वनाथ गांवस हांच्या घराचेर रानवटी झाड पडिल्ल्यान घराचें कांय प्रमाणांत लुकसाण जालें.
मजगतीं, पडझडीचो अहवाल वरिश्ठ अधिकाऱ्यांक सादर करतले अशी म्हायती उजो पालोवपी दळाच्या अधिकाऱ्या कडल्यान मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
