अटीतटीचे मॅचींत  कोलकाताचें आरसीबीचेर एका धांवडेन जैत. विल जॅक्सीची अर्द शेंकड्याची खेळी  निर्फळ

भांगरभूंय | प्रतिनिधी

खबरां संस्था
कोलकाताः कोलकातांत आपल्या घरच्या ईडन गार्डन्स स्टेडियमाचेर आयपीएलांतली  36 वी मॅच खेळटना कोलकाता नायट रायडर्सान (केकेआर) रॉयल चॅलेंजर्स बेंगळुरूचेर (आरसीबी) फकत एके धांवडेन जैत मेळोवपाचो चमत्कार करून दाखयलो. ह्या मॅचींत  रॉयल चॅलेंजर्साचो कॅप्टन फाफ डिप्लासीन टॉस जिखून कोलकाता नायट रायडर्साक पयली बॅटींग करपाक सांगलें आनी तांणी श्रेयस अय्यराच्या अर्द शेंकड्याच्या नेटार  आरसीबी सामकार 223 धांवड्यांचें लक्ष्य दवोरले. ताचो फाटलाव करतना आरसीबीचो पंगड 221 धांवड्यांत आवट जालो.
कोलकाता नायट रायर्डसान स्वास आडावन धरपाक लावपी हे मॅचींत रॉयल चॅलेजर्स बेंगळुरूक एके धांवडेन हारयलें. पयलीं खेळून कोलकाता नायट रायडर्सान 20  ओव्हरींत 6 विकेटी वोगडावन 222 धांवड्यो केल्यो. बेंगळुरून जैता खातीर निमण्या बॉलार तीन धांवड्यांची गरज आशिल्ली. मात तांकां एकूच धांवडी करपाक मेळ्ळी आनी हार खावची पडली. विल जॅक आनी रजन पटिदार हाचे मदली शेंकड्यांची भागिदारी आनी निमणे ओव्हरींत कर्ण शर्माची उत्कृश्ट कामगिरी आसूनय तांकां लक्ष्य हातासपाक मेळ्ळें ना.
कोलकाता नायट रायडर्सा खातीर श्रेयस अय्यरान अर्द शेंकडो केलो आनी रसेल आनी रमणदीप सिंगान नेटाची खेळी करून बंगळुरू सामकार 223 धांवड्यांचें लक्ष्य दवोरिल्लें. लक्ष्याचो फाटलाव करतना तांची सुरवात बरी जाली ना. मात जॅकान 32 बॉलांत 55 धांवड्यांची आनी रजत पटिदारान 52 धांवड्यांची खेळी करून कोलकाताच्या बॉलरांक आडायलें. मात आंद्रे रसेल आनी सुनील नरेन हांणी मदल्या ओव्हरींत थारावीक अंतरान बेंगळुरूच्यो विकेटी घेतल्यो आनी   कोलकाताक परत मॅचींत हाडलें. बेंगळुरुच्या बॅट्समनानी नेटान खेळ केलो तरी दुसऱ्या टोका वटेन तांच्यो विकेटी पडत गेल्यो.

निमणे ओव्हरींत 21 धांवड्यो
बेंगळुरूक  जैता खातीर निमणे ओव्हरींत 21 धांवड्यो करपाची गरज आशिल्ली. आनी आयपीएलांतलो सगल्यांत म्हारग बॉलर मिचेल स्टार्क बॉलींग करपा खातीर आयलो. मात कर्ण शर्मान ताच्या तीन बॉलांचेर तीन सके हुबयले. दोन बॉलांत जैता खातीर तीन धांवड्यो जाय आशिल्ल्यो तेन्ना स्टार्कान कर्णाक आपल्या बॉलार कॅच आवट केलें. निमण्या बॉलांत तीन धांवड्यो जाय आशिल्ल्यो आनी लॉकी फर्ग्युसन स्ट्रायकार आशिल्लो. ताणे बरो शॉट मारलो पूण दुसरी धांवडी पुराय करतना तो रनआवट जालो. अशे तरेन उमळशीक वाडोवपी हे मॅचींत बेंगळुरूक एके धांवडेन हार खावची पडली.
साल्ट (48), कॅप्टन श्रेयस अय्यराचो 7 चौके आनी एका सक्यान केल्लो अर्द शेंकडो, रिंकू सिंग (24) आंद्रे रसेल (नाबाद 27) रणदीप हुडा (नाबाद 24) हांणी कोलकाताक 20 ओव्हरींत 6 आवट 222 धांवड्यो करून दिल्यो. यश दयाळ आनी कॅमरून ग्रीन हांणी दरेकी दोन विकेटी  घेतल्यो. सिराज, फर्ग्युसन हांका दरेकी एक विकेट मेळ्ळी.
35 धांवड्यांत विराट कोहली आनी कॅप्टन  डिप्लासीस आवट जाल्ल्यान बेंगळुरुच्या आव्हांनातली धार बरीच उणी जाल्ली. मात विल जॅक (55) आऩी रजन पटिदार (52) हांणी पंगडाच्या आव्हानाक परत धार हाडली. गोंयच्या सुय़श प्रभुदेसायाच्यो 24 धांवड्यो, दिनेश कार्तिक (25) आनी कर्ण शर्मान  पंगडाक जैता सामकार हाडिल्लें. पूण आयचो दीस बेंगळुरूचो नाशिल्लो. हशमीत राणा (2), सुनील (2), आंद्रे रसेल (3) ह्या बॉलरांनी कोलकाताचें अशक्य अशें जैत शक्य करून दाखयलें.