भांगरभूंय | प्रतिनिधी
पणजी: लिंगीक अत्याचार प्रकरणांतल्या दुबावीत लेझिओ फर्नांडीस हाणें जामीन अटींचें उल्लंघन केल्ल्याचो दावो पिडीत बायलेन केला. ह्या प्रकरणांत ते बायलेन मुंबय उच्च न्यायालयाच्या गोंय खंडपिठांत धांव घेवन ताचो जामीन रद्द करपाची मागणी केल्या. न्यायालयान दुबाविताक हे विशींची नोटीस दिल्या.
पिडीत बायलेन पणजी बायलां पुलीस स्टेशनार कागाळ दाखल केल्ली. ते प्रमाण दक्षिण गोंयांतल्या 32 वर्सां पिरायेच्या लेझिओ फर्नांडीस ह्या तरणाट्यान तिका लग्नाचें हांयस दाखोवन 8 ते 19 जानेवारी मजगतीं तिचेर खूबशे फावटी लिंगीक अत्यचार केल्ल्याचें म्हणलां. ते प्रमाण बायलां पुलीस स्टेशनाच्यो निरिक्षक रीमा नायक हांच्या मार्गदर्शना खाला उपनिरिक्षक रुपाली गोवेकार हांणी दुबावीत फर्नांडीस हाचे आड भादंसंच्या कलम 420 आनी 376 खाला 25 जानेवारी 2024 दिसा गुन्यांव दाखल केलाे.
ह्याच वेळार दुबावीत फर्नांडीस हाणें मडगांवच्या दक्षीण गोंय जिल्हो आनी सत्र न्यायालयांत अटकपूर्व जामीन दाखल केलाे. तो भायरायले उपरांत दुबावितान मुंबय उच्च न्यायालयाच्या गोंय खंडपिठांत अटकपूर्व जामीन दाखल केलाे. ह्या प्रकरणांत न्यायालयान दुबावीत फर्नांडीस हाका सशर्त अटकपूर्व जामीन मंजूर केलाे. तातूंत दुबाविताक हेर अटी सयत पिडीत बायलेच्या वाठारांत वचपाक बंदी घाल्ली. अशें आसतना दुबावितान पिडीत बायलेच्या वाठारांत संगिताची कार्यावळ आयोजीत केल्ल्याचो दावो करून ताणें अटकपूर्व जामिनाच्या अटींचें उल्लंघन केल्ल्याचो दावो करून पिडीत बायलेन न्यायालयांत याचिका दाखल केल्या.
11 जून दिसा सुनावणी
बायलां पुलिसांनी तपास पुराय करून दुबावीत लेझिओ फर्नांडीस हाचे आड मडगांवच्या पयलो वर्ग न्यायालयांत आरोपपत्र दाखल केलां. मजगतीं, संबंदीत प्रकरण सत्र न्यायालयाच्या अधिकारक्षेत्रांत येत आशिल्ल्यान न्यायालयान दक्षीण गोंय जिल्हो आनी सत्र न्यायालयांत वर्ग केलें. ह्या प्रकरणाची सत्र न्यायालयान दखल घेवन फुडली सुनावणी 11 जून दिसा दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
