भांगरभूंय | प्रतिनिधी
मडगांव: कोंब मडगांवां वितळिल्ल्या भांगराच्यो वस्ती करपी तिगां कारागिरांनी 72 लाखांचें 959 ग्राम भांगर घेवन पळ काडिल्लो. हाब्रा कोलकाता हांगा सावन तिगांय दुबावितांक अटक करून मडगांवां हाडले. तांचे कडल्यान 14.83 लाखांचें भांगर जप्त केलें. न्यायालयान तिगांकूय आठ दिसांची पुलीस कोठी दिल्या.
मडगांवचे प्रितेश लोटलीकार हांणी कारागिरांनीच भांगराची चोरी करून पळ काडिल्ल्याची कागाळ मडगांव पुलिशेंत केले उपरांत सुप्रोकाश मोंडल (29, रा. मिनाखाण, अस्तंत बंगाल), संजोय मोंडल (22, रा. महाराजपूर, अस्तंत बंगाल) आनी तापस जना (44, रा. महाराजपूर, नारायणपूर, अस्तंत. बंगाल) हांचो सोद घेवपाचें काम सुरू केलें. ह्या कारागिरांनी प्रितेश लोटलीकार हांचे कडेन फाटल्या देड वर्सां सावन वितळिल्ल्या भांगरा पसून भांगरच्यो वस्ती तयार करपाच्या कामांत विस्वास संपादन केल्लो. 29 नोव्हेंबर रातीं पावणे इकरा वरां सावन 30 नोव्हेंबर सकाळ मेरेनच्या काळांत ह्या तिगांय कामगारांनी भांगराच्यो वस्ती तयार करपा खातीर 72 लाखांचें 959 ग्राम भांगर घेवन पळ काडलो.
मडगांव पुलिसांनी पंगड स्थापन केलो. पुलीस उपनिरिक्षक समीर गांवकार, रिझवान शेख, समीर बोरकार, रोनीत नायक हांणी दुबावितांचो सोद घेवन अस्तंत बंगालांत गेले. कोलकाता पुलिसांचे मजतीन हाब्रा हांगा तिनूय दुबावितांक अटक केली. परगानास हांगासरल्या न्यायदंडाधिकार्या मुखार हजर केले आनी हस्तांतरणाची प्रक्रिया पुराय करून बुधवारा रातीं दीड वरांचेर मडगांव स्टेशनार हाडले.
ह्या प्रकरणांत पुलीस अधिक्षक सुनिता सावंत हांचे देखरेखी खाला पुलीस उपअधिक्षक सिध्दांत शिरोडकार, मडगाव पुलीस निरिक्षक तुळशीदास नायक हांच्या मार्गदर्शना खाला ही कारवाय केली.
तपासा खातीर टेक्निल सर्व्हिलन्साची मजत
ह्या प्रकरणांतल्या दुबावितांक धरपा खातीर तांचो मोबायल क्रमांक टेक्निल सर्व्हिलनसार घालो. तशेंच अस्तंत बंगालांतले खूबशे कामगार मडगांवां आसून दुबावितां मदीं एकाल्याचो भाव रावणफोंडार काम करीत आशिल्ल्याचें समजले उपरांत पुलिसांक आनीक गरजेची म्हायती मेळ्ळी.
205 ग्राम भांगर जप्त
दुबावीत तिनूय कामगारांनी 905 ग्राम भांगराची चोरी केल्ली. पूण तातूंतलें चडशें भांगरची तांणी विकिल्लें. मडगांव पुलिलसांनी अटक केली त्या वेळार फक्त 205.281 ग्राम भाांगर जप्त केलें. हाचें मोल 14 लाख 83 हजार इतलें आसा. दुबावितांनी विकिल्लें भांगरूय फुडल्या तपासांत जप्त करतले अशी म्हायती पुलीस अधिक्षक सुनिता सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
