भांगरभूंय | प्रतिनिधी
हर करम अपना करेंगें
ऐ वतन तेरे लिए
दिल दिया है, जां भी देगें
ए वतन तेरे लिए…..
मायभूंये खातीर लढप, वेळ आयल्यार जीव दिवप हे सारकें पुण्य ना. मात फाटल्या 30-40 वर्सां सावन आमकां झुजा मळाचेर न्हय, तर धर्मांध आतंकवाद्यांक लागून मरण येवपाक लागलां. एकल्या काश्मीरांत देश स्वतंत्र जायत सावन हजारांनी जवान शहीद जाल्यात. बाॅम्बस्फोटांक लागून कोट्यांनी रुपयांची मालमत्ता काबार जाल्या. तरीय आमचे जवान भियेनासतना आतंकवाद्यां कडेन दोन हात करतात. दोळ्यांत तेल घालून रातदीस शिमेची राखण करतात. ते आसात म्हूण आमी सुशेगाद हुस्क्या मेकळे न्हिदपाक शकतात. इराक, सिरीया, अफगाणिस्ताना सारक्या देशांनी लोकांक जें भोगचें पडलां, ताका जापसालदार ही झुजां, आतंकवादी हल्ले, सूड, एकामेकांचो दुस्वास…. ह्या सगल्यांक राखण दिवपाक लश्कराची गरज नाजाल्यार आनी अफगाणिस्ताना सारकी परिस्थिती जातली.
आमच्या देशाचेरूय पाकिस्तान, चीनान घुरी घाल्ली. अजून तांच्यो लश्करी कारवायो उण्यो जावंक नात. अटलबिहारी वाजपेयी प्रधानमंत्री आसतना कारगील झूज जाल्लें. तातूंत भारताक जैत मेळ्ळे, पूण आमच्या बऱ्याच जवानांक गरजे भायर जीव वगडावचो पडलो. पंजाब, महाराष्ट्रा सारक्या राज्यांतले तरणाटे आपखोशयेन लश्करांत वतात. मात, हे बाबतींत गोंयकारांचो आंकडो उणो आसा. गोंयकार नात अशें न्हय. सुनिथ राॅड्रिगीश हांचे सारके गोंयकार लश्कर मुखेली पसून जाल्यात, पूण गोंयकार व्हड संख्येन लश्करांत भरती जाल्ले दिसनात. हालींच सरकारान अग्निपथ येवजण घोशीत केल्या. लश्करांत चार वर्सां नोकरी करपाची. मागीर जवानांक ताचें राज्य सरकारी नोकरी दितलें. पेन्शन मात मेळची ना. सुरवेक 46 हजार तरणाट्यांक लश्करांत अग्नीवीर म्हूण भरती करतले. तांकां 30 ते 40 हजार रुपया पगार मेळटलो. सेवेंत आसतना विकलांग जाल्यार शिल्लक नोकरेचो पगार आनी 44 लाख रुपया मेळटले. मरण आयल्यार ताच्या कुटुंबाक 1 कोटी रुपया. हातूंतले जे तरणाटे हुशार आसात, तांकां लश्करांत नियमित कॅडरांनी आसपावन घेतले. इस्रायलांत प्रत्येक नागरिकाक एक वर्सा खातीर लश्करांत वचप बंधनकारक आसा, तशीच कांयशी ही येवजण. मात हांगा जाका इत्सा आसा, ताणेंच वच्चें. कोणाक सक्ती, बंधन ना.
तशें पळोवपाक गेल्यार ही बरी येवजण. पेन्शनाचेर जावपी खर्च उणो जातलो. मात आतां उत्तर प्रदेश, बिहारांत विद्यार्थी आनी तरणाट्यांनी आंदोलन सुरू केलां. रेल्वेक उजो लायिल्ल्यान तें हिंसकूय जालां. ‘भाजप सरकारान लश्कराची परंपरा, मुल्यां, शिस्त, प्रतिश्ठे कडेन तडजोड करची न्हय. स्वताचें खाजगी लश्कर निर्माण जावपा बगर हे येवजणेंतल्यान कांय साध्य जावचें ना. ही देशद्रोही कृती. जर सगल्यांत चड रोजगार दिवपी रेल्वे आनी लश्करान कंत्राटाचेर नोकऱ्यो दिल्यो जाल्यार तरणाटे कितें करतले? हे तरणाटे 21 वर्सां जाले उपरांत लश्करांत वचपाक शकतात. ह्या पदविका क्रॅश कोर्साचो तरणाट्यांक व्हडलोसो उपेग जावचो ना’, अशें विरोधी फुडारी म्हणटात. कांय निवृत्त उंचेल्या अधिकाऱ्यांकूय तशेंच दिसता. पयशे वाटावपाक हें करचें न्हय. हे प्रशिक्षीत तरणाटे जर चार वर्सां उपरांत बेकार उरले जाल्यार बंडखोर, अतिरेक्यांक वचून मेळूं शकतात, असो तांचो दावो.
केंद्र सरकारान ही अग्निपथ येवजण जाहीर करतकच कांय राज्यांच्या मुख्यमंत्र्यांनी तिका येवकार दिवन ह्या तरणाट्या जवानांक सरकारी नोकरी राखून दवरपाची घोशणांय केल्या. गोंय सरकारान पसून. मात गोंयच्यान कितले तरणाटे शिमेचेर लढपाक वतले हें कळना. साडे सतरा ते 21 वर्सां पिरायेच्या चडांत चड गोंयकारांनी हे येवजणेचो लाव घेवचो, हे खातीर थळावो नौदल विभाग यत्न करता. ही रोजगाराची संद ही गजाल खरी, पूण ‘वन रेन्क, वन पेन्शना’ च्या समर्थकांचो हाका खर विरोध आसा. कसलीच तयारी करीनासतना, लश्कराक विस्वासांत घेनासतना सरकारान हो निर्णय घेतला, अशें तांकां दिसता. सध्या तरी अग्निपथ येवजण स्वताच उज्याच्या मार्गा वयल्यान चलतना दिसता. लश्करा वांगडा (आनी हेर विरोधक) विचारमंथन करून पावलां उखलल्यार घडये हो उजो पालवत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
