भांगरभूंय | प्रतिनिधी
दर 3 वर्सांनी बियाण्यांत बदल करपाचो सल्लो
पणजी, प्रतिनिधी : दर वर्सा प्रमाण अंदूंय शेतकी खातें शेतकारांक 50 टक्के सवलतीच्या दरांत भाताचें बियाणें उपलब्ध करतलें. विभागीय शेती कार्यालयांत तें मेळटलें. पीक वाडपा खातीर दर 3 वर्सांनी शेतकारांनी बियाण्यांत बदल करपाक जाय, असो सल्लो शेतकी संचालक नेविल आफोन्सो हांणी दिला.
हेर बियाण्यांचे तुळेत जया, ज्योती आनी कर्जत ह्या जातींचीं बियाणीं उत्पादन चड दिता. सामान्य लोकां खातीर भाजयेची बियाणींय 50 टक्के सवलतीच्या दरात मेळटलीं. अजून मॉन्सून पावूंक नासलो तरी आडवेळ्या पावसाक लागून ओलसाण तयार जाल्या. हाका लागून जूनाचे सुरवेक खरीप हंगामाक सुरवात जातली. शेतकारांक अनुदान तशेंच हेर सेवा शेतकी खात्या वतीन दितले, अशें आफोन्सो हांणी सांगलें. नांगरणे खातीर 50 टक्के भाड्यान ट्रॅक्टर विभागी शेती कार्यालय दितलें. आंबे, नाल्ल, काजी, पेरांच्या लागवडी खातीर रोपां तशेच सारें सवलतीच्या दरात उपलब्ध आसतलें, अशी म्हायतीय आफोन्सो हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
