भांगरभूंय | प्रतिनिधी
चणाक, शेवटो, तिसऱ्यो हांच्या उत्पादनांत वाड
पणजी: फाटल्या वर्साचे तुळेन गोंयच्या दर्यांतल्या नुस्त्याचें उत्पादन उणें जाल्लें आसलें तरी साव्या उदकांतल्या नुस्त्यांचें उत्पादन वाडलां. फाटल्या पांच वर्सांचे तुळेन अंदूं विक्रमी नुस्त्या उत्पादन जालां. अंदूं चणाक, शेवटो, सांगटां, तिसऱ्यो, कुल्ली, सुंगटा हांच्या उत्पादनांत वाड जाल्या. 2023-24 ची आंकडेवारी ही तात्पुरत्या स्वरुपाची आशिल्ल्याची म्हायती नुस्त्या उद्देग खात्यातल्या वरिश्ठ अधिकाऱ्यांनी दिली.
मेळिल्ले म्हायती प्रमाण 2019-20 सावन 2023-24 मेरेन साव्या उदकांतल्या नुस्त्याच्या उत्पादनांत दर वर्सा वाड जायत आसा. 2019-20 वर्सा नुस्त्या उत्पादन 4081 टन आशिल्लें. 2020-21 वर्सा 5325 टन आशिल्लें. 2022-23 वर्सा साव्या उदकांतलें वट्ट नुस्त्या उत्पादन 6308 टन आशिल्लें. 2023-24 वर्सा तातूंत 2090 टनांची वाड जावन तें 8651 टन जालें. 2022-23 वर्सा ल्हान, मध्यम आनी व्हड आकाराच्या सुंगटांचें 937 टन उत्पादन जाल्लें. 2023-24 वर्सा तें वाडून 1384 टन जालें.
तशेंच 2022-23 वर्सा साव्या उदकांतल्या कुल्ल्यांचें उत्पादन 548 टन आशिल्लें. 2023-24 वर्सा तातूंत 243 टनांची वाड जावन तें 791 टन जालें.
2022-23 वर्सा चणाकाचें उत्पादन 230 टन आशिल्लें. 2023-24 वर्सा तातूंत 14 टनांची वाड जावन तें 244 टन जालें. 2022-23 वर्सा शेवट्याचें उत्पादन 609 टन आशिल्लें. 2023-24 वर्सा तें 797 टन जालें. 2022-23 वर्सा सांगटांचें उत्पादन 526 टन आशिल्लें. 2023-24 वर्सा तें 831 टन जालें. 2022-23 वर्सा तिसऱ्याचें उत्पादन 566 टन आशिल्लें. जाल्यार 2023-24 वर्सा तें 866 टन जालें.
मुड्डशी, केर, काळ्या खुब्यांचें उत्पादन उणावलें
मेळिल्ले म्हायती प्रमाण मुड्डशी, केर, काळ्या खुब्यांचें साव्या उदकांतलें उत्पादन उणें जालें. 2022-23 वर्सा मुड्डशीचें उत्पादन 209 टन आशिल्लें. 2023-24 वर्सा तें 153 टन जालें. 2022-23 वर्सा केरचें उत्पादन 67 टन आशिल्लें. 2023-24 वर्सा तें 54 टन जालें. जाल्यार 2022-23 वर्सा काळ्या खुब्यांचें उत्पादन 72 टन आशिल्लें. 2023-24 वर्सां तें 25 टन जालें.
वर्सा प्रमाण उत्पादन (टनांत)
नुस्तें / 2019-20/ 2021-22/ 2022-23/2023-24
चणाक/ 61/128/102/230/244
शेवटो/ 461/598/560/609/797
कुल्ली / 382/567/410/548/791
सुंगटां / 444/775/962/937/1384
तिसऱ्यो / 227/200/311/566/866
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
