भांगरभूंय | प्रतिनिधी
पणजी, बातमीदार ः भारतीय हवामान खात्यान (आयएमडी) अंदूं राज्या सयत पुराय देशांत सरासरी परस चड पावस पडटलो असो अदमास उक्तायला. अंदूं देशांतल्या सरासरीच्या 106 टक्क्यां मेरेन मान्सूनचो पावस पडपाची शक्यताय खात्यान उक्तायल्या. हाचे आदीं एशिया पॅसिफीक इकॉनोमिक कॉर्पोरेशन क्लायमेट सेंटर (एपीसीसी) ह्या संस्थेन मान्सून सरासरी परस चड जाल्यार स्कायमेटान सरासरी इतलोच पावसाचो अदमास काडिल्लो.
हवामान खात्यान सोमारा मान्सूनचो पयलो अदमास जारी केला. हाचे प्रमाण पॅसिफीक म्हासागरांतली ‘एल निनो’ परिस्थिती सध्या दुबळी जायत आसा. कांय म्हयन्यांनी ती न्युट्रल जावपाची शक्यताय आसा. हाचे उपरांत ऑगस्ट वा सप्टेंबर म्हयन्यांत ‘ला नीना’ परिस्थिती निर्माण जावपाची शक्यताय आसा. ला नीना हो पावसाळ्याक पूरक आसता. हो खात्याचो प्राथमीक अदमास आसा आनी मे म्हयन्याच्या निमाण्या सप्तकांत चड सविस्तर अदमास जाहीर जातलो.
खात्याच्या अदमासा प्रमाण, सरासरी परस चड पावस पडपाची शक्यताय 31 टक्के, सरासरी परस चडूच पावस पडपाची शक्यताय 30 टक्के, सरासरी इतलोच पावसाची शक्यताय 29 टक्के, सरासरी परस कमी पावस पडपाची शक्यताय 8 टक्के आनी उण्यांत उणो पावस पडपाची शक्यताय फकत 2 टक्के आसा. वेगवेगळे वातावरणीय घटक आनी मॉडेल हांचो अभ्यास करून मान्सून विशीं अदमास खात्या कडल्यान जाहीर करतात.
पणजीत तापमान 34.3 अंश
मजगतीं, राज्यांत उश्णताय वाडल्या. सोमारा पणजींत चडांत चड तापमान 34.3 अंश सेल्सियस नोंद जालें. हें तापमान सामान्य तापमानापरस 1 अंश सेल्सियस चड आशिल्लें. जाल्यार मुरगांव हांगा चडांत चड तापमान 33.7 अंश सेल्सियस आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
