भांगरभूंय | प्रतिनिधी
पणजी : अंदूंच्या पावसाळ्यांत पर्यटना खातीर नव्या थळा वयले घसघशे जाहीर जातले. गांवगिऱ्या वाठारांत खंय, खंय घसघशे आसात, ताचो सोद घेवन तांच्यो सुवातो जाहीर जातल्यो. तशेंच घसघशांचेर सुरक्षा उपाय लेगीत घेतले. गोंय रानां उदरगत म्हामंडळाचे (जीएफडीसी) बसकेंत हो निर्णय जालो.
गोंय रानां उदरगत म्हामंडळाची बसका अध्यक्ष डॉ. देविया राणे हांच्या फुडारपणा खाला जाली. मुखेल रानां संरक्षक कमल दत्ता, म्हामंडळाचे वेवस्थापकी संचालक के. रमेश कुमार, सरवेवस्थापक अमर हेबळेकार आनी हेर वांगडी हाजीर आशिल्ले.
जैवपर्यटनाक उर्बा दिवपा सयत पर्यटकां खातीर सुविधा निर्माण करपाच्या प्रस्तावांचेर चर्चा जाली. बोंडला अभयारण्यांत पावसाळ्यांत लेगीत पर्यटक येतात. पर्यटकांक रावपा खातीर आशिल्ल्या कॉटेजींनी सुदारणा आनी सुविधा निर्माण जातल्यो. साळावली धरणाचेर सुरू आशिल्ल्या भुरग्यांचे बागेच्या कामाचो नियाळ बसकेंत घेतलो. पावसाळ्यांत घसघशांचेर पर्यटक तशेंच थळावे लोक बुडून मरपाच्यो घडणुको घडल्यात. हे फाटभुंयेर घसघशांचेर सुचोवणी तकटे लावपा सयत सुरक्षेचे उपाय घेतले. तशेंच गांवगिऱ्या वाठारांनी खूबशे घसघशे आसात, मात तांची म्हायती सगल्यांक ना. ह्या घसघशांचो सोद घेवन तांचीं थळां जाहीर जातली. हे घसघशे पर्यटन नकाशाचेर हाडपाचो निर्णय रानां उदरगत म्हामंडळान घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
