भांगरभूंय | प्रतिनिधी
नवी दिल्ली, खबरां संस्था : उणो पावस, आडोळो पावस आनी गारो पडप अशा सैमीक संकश्टांक लागून देशांत अंदूं कड्डण उत्पादनांत उणाव जातलो, असो अदमास आसा. वेंचणुकेचे फाटभुंयेर केंद्र सरकाराक कड्डणाचो उणाव जावचो न्हय, दर नियंत्रणांत उरपाचे हे खातीर संवसारभरांतल्यान कड्डणांची आयात करप सुरू केलां. हालींच ब्राझीलांतल्यान 3000 टन उडदाची आयात जाल्या. आनीक 20000 टन उडीद आयात करतले.
केंद्रीय वाणिज्य सचीव रोहित कुमार सिंह हांणी दिल्ले म्हायती प्रमाण, देशांत तुर, उडीद आनी मसुरीचो उणाव जावपाक लागला. ही तूट उणी करपा खातीर आनी दर नियंत्रणांत दवरपा खातीर संवसारांतल्या कड्डण उत्पादक देशांतल्या वेपाऱ्यांक भारतांत चडांत चड कड्डण निर्यात करपाचें आवाहन केंद्रान केलां. ताचो एक भाग म्हूण हालींच ब्राझीलांतल्यान 3000 टन उडीद आयात जाला आनी बेगीनूच आनीक 20000 टन आयात जातलो.
शेतकी खात्यान 2023- 24 वर्साच्या शेतकी उत्पादनाच्या पयल्या अदमासा प्रमाण देशांतल्या कड्डणाच्या उत्पादनांत व्हडली तूट येवपाची अदमास आसा. तुरीचें उत्पादन 34.21 लाख टन, मुगाचें 14.05 लाख टन आनी उडदाचें 15.05 लाख टन जातलें असो अदमास आसा. तुरीचें प्रत्यक्ष उत्पादन 30 लाख टन मेरेन जावपाचो असो अदमास आसा. हेर कड्डणाच्या उत्पादनाचीय अशीच परिस्थिती आसता. देखून केंद्र सरकाराक व्हड प्रमाणांत तें आयात करपा बगर दुसरो पर्याय नाशिल्लो.
भारतीय दाळ आनी कड्डण संघटणेन दिल्ले म्हायती प्रमाण, देशांत दर वर्सा सरासरी 2.6 ते 2.8 कोटी टन कड्डण तयार जाता. अंदूं तें 10 ते 15 टक्क्यांनी उणें जावपाचो अदमास आसा. फाटलीं कांय वर्सां दर वर्सा 25 ते 30 लाख टन कड्डणाची आयात जाताली. अंदूं ती वाडटली. मुखेलपणान तुर, उडीद आनी मसूर हांची आयात. ऑस्ट्रेलिया, कॅनडा, रशिया, म्यानमार, मोझांबीक, टांझानिया, सुदान, मलावी ह्या देशांतल्यान कड्डण आयात करपाचेर सरकार भर दितलें.
तुर, उडीद दाळ 180 रुपया कील
सध्या बाजारांत तुर आनी उडीद दाळीचो उणाव आसा. फाटल्या दोन म्हयन्यांत उदीद दाळ 25 रुपयां वयल्यान वाडून 160-180 रुपया आनी तुरदाळ 20 रुपयां वयल्यान वाडून 150- 180 रुपया जाल्या. उडीद दाळीचो व्हड उणाव आसा. दाळ वेपारी नितीन नाहर हांणी मसुरीचो तसो उणाव ना, दर 85 ते 90 रुपया मेरेन थीर आसात अशी म्हायती दिली.
कड्डण उत्पादनाचो अदमास
पावशी हंगाम – 71.18 लाख टन
वायंगण हंगाम – 181 लाख टन
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
