भांगरभूंय | प्रतिनिधी
‘ बूक माय शो’ वेल्यान महोत्सवाचें थळ जाहीर
पणजी: अंदूंचो सनबर्न महोत्सव 28 ते 30 डिसेंबर ह्या काळांत धारगळे जावपाची शक्यताय आसा. ‘बूक माय शो’ ह्या वॅबसायटी वेल्यान आयोजकांनी धारगळ हें थळ जाहीर केलां.
सनबर्न महोत्सवाच्या आयोजना वेल्यान फाटल्या कांय दिसांनी गोंयांत वाद पेटिल्लो. अंदूंचो महोत्सव आयोजकांनी उत्तर गोंया बदला दक्षीण गोंयांत आयोजीत करपाचें निश्चीत केल्ल्याचें स्पश्ट जातकच, विरोधी काँग्रेस पक्ष आनी दक्षीण गोंयच्या लोकांनी महोत्सवाक खर विरोध केलो.
साश्टींतल्या खूबशा पंचायतींनी दक्षीण गोंयांत सनबर्न महोत्सवाक विरोध करून ते विशींचे थारावूय ग्रामसभांनी घेतिल्ले. उपरांत सरकार उद्देग विकास म्हामंडळाचे सुवातेंत हो महोत्सव आयोजीत करपाच्या यत्नांत आशिल्ल्याचो दावो करून प्रदेश काँग्रेसीन आक्रमक भुमिका घेतिल्ली. पूण, आतां हो महोत्सव दर वर्सा प्रमाण उत्तर गोंयांतूच आयोजीत करपाची शक्यताय आसून ते खातीर आयोजकांनी ह्या वेळार धारगळची निवड केल्ल्याचें ‘बूक माय शो’ वेल्यान मुखार आयलां.
मजगतीं, सनबर्न महोत्सवांत व्हड प्रमाणांत घुंवळे वखदांचो वापर जायत आशिल्ल्याचो आरोप फाटल्या काय वर्सां सावन सेगीत जातालो. ताका लागून ड्रग्साक थारो दिवपी महोत्सव गोंयांत नाकाच, अशी भुमिका घेवन खूबशा जाणांनी सनबर्न महोत्सवाक स्पश्ट विरोध केला. पूण ह्या महोत्सवाक लागून चडांत चड पर्यटक गोंया कडेन आकर्शीत जायत आशिल्ल्याचो दावो करून सरकारा कडल्यान सेगीत महोत्सवाचें समर्थन जायत आसा.
अंदूंच्या महोत्सवाक अजून कसलेच परवाने दिल्ले नात अशें स्पश्टीकरण मुख्यमंत्री डॉ. प्रमोद सावंत आनी पर्यटन मंत्री रोहन खंवटे हांचे कडल्यान दीत आसतनाच आयोजकांनी मात धारगळ हें थळ निश्चीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
