भांगरभूंय | प्रतिनिधी
वैजकी, साहसी, चार्टर्ड पर्यटन वेवसायाक मेळटली चालना
म्हापशें: ‘हॅली टुरिझम’ हॅलिकॉप्टर सेवा गोंयांतल्या वैजकी, साहसी आनी चार्टर्ड पर्यटन वेवसायाक चालना दितली. हे सेवेंतल्यान गोंयांतल्या नव्या पर्यटन वेवसायाक चालना मेळटली. हे सेवे वरवीं गोंयांत प्रवेश करपा सयत गरजे वेळार हेर राज्यांनी वचपाक मेळटलें, अशें मुख्यमंत्री डॉ. प्रमोद सावंत हांणी सांगलें.
शुक्रारा सकाळीं आग्वाद सिकेरीच्या हॅलीपेडाचेर हॅली- टुरिझम सेवेचें मुख्यमंत्र्यां हस्तुकीं उक्तावण जालें. मुख्यमंत्र्यान हॅलिकॉप्टरांतल्यान पासय लेगीत मारली. ब्लेड इंडिया आनी राज्य सरकाराच्या जोड पालवान ही सेवा सुरू केल्या. ह्या वेळार कंपनीचे संस्थापक करणपाल सिंग आनी सनी गोगलानी तशेंच हेर मानेस्त हाजीर आशिल्ले.
गोंयांत दर वर्सा 8 दशलक्ष पर्यटक येतात. हॅल- टुरिझम सेवेक लागून पर्यटन वेवसायांत आनीक वाड जातली. गोंयांतल्या भितरल्या वाठारांत जय अजून पर्यटनाचे नदरेन चालना दिवंक ना, अशा वाठारांतल्यान ही सेवा सुरू जातली. वैजकी आपत्कालीन सेवे खातीर हे नवे सुविधेचो लाव निश्चीत जातलो, अशें मुख्यमंत्री डॉ. सावंत हांणी सांगलें.
सनी गोगलानी हांणी सांगलें, मळब मार्गांतल्यान गोंयच्या सैमाचो आनंद घेवचे खातीर हे सेवेचो वापर करतले. रस्त्याचेर वाडिल्ले येरादारीक लागून खूब खेपे पर्यटकांक त्रास सोंसचो पडटा. हे सेवे वरवीं येरादारी सेवेंतलें सोंपेपण वाडटलें. सध्या ही सेवा विमानतळा वयल्यान उत्तर गोंय आनी दक्षीण गोंयांतल्या हॅलीपेडाचेर दितले. ही सेवा सर्वसामान्यांक परवडटली. गोंयांतल्या म्हत्वांच्या स्थळांची जोडणी सहजतायेन जावची, दोन स्थळां मदलें अंतर उणें जावचें, वेवसायाक चालना मेळची ह्या उद्देशान ही सेवा सुरु केल्या.
गोंया भितरले सेवे वांगडाच शेजारच्या महाराष्ट्रांतल्या कोल्हापूर, मुंबय, पुणे सारकिल्ल्या शारांनी वचपा खातीर हे सेवेचो वापर करतले. ही सेवा महाराष्ट्र आनी कर्नांटकांत सुरू आसा, अशी म्हायती सनी गोगलानी हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
