भांगरभूंय | प्रतिनिधी
मडगांवच्या 8 नगरसेवकांचो भाजपांत प्रवेश
पणजी: नगराध्यक्ष वेंचपा वेळार हात वयर करून मतदान करप योग्य आसा. नगराध्यक्ष वेंचणुकेंत गुप्त मतदान प्रक्रियाच आपणावची अशी पालिका कायद्यांत तरतूद ना. नगराध्यक्षाची निवड ही कायद्या प्रमाण जायत आसा अशें स्पश्टीकरण दिगंबर कामत हांणी काल (आयतारा) पणजेंत आयोजीत केल्ले पत्रकार परिशदेंत दिलें.
ह्या वेळार तांचे सयत भाजपाचे फुडारी दामू नायक, आदले खासदार अॅड. नरेंद्र सावयकार, रुपेश महात्मे हाजीर आशिल्ले. ह्या वेळार मडगांव नगरपालिकेच्या 8 नगरसेवकांक मुख्यमंत्री डॉ. प्रमोद सावंत हांचे हाजिरेंत भाजपांत प्रवेश दिलो. मुख्यमंत्र्यांनी ह्या सगल्या नगरसेवकांक भाजपांत येवकार दिवन तांकां फुडले वाटचाली खातीर शुभेत्सा दिल्यो.
शेनवारा गोवा फॉरवर्ड, काँग्रेस तशेंच राष्ट्रवादीच्या फुडाऱ्यांनी राज्यपालांची भेट घेवन पालिका कायद्यांत केल्लो बदल फाटीं घेवपाची मागणी केल्ली. ह्या विशयाचेर उलयतना कामत हांणी म्हणलें, आमी खंयच लोकशायेचो खून केल्लो ना. हात वयर करून नगरसेवकांनी मतदान करप योग्य आसा अशें दिगंबर कामत हांणी म्हणलें.
8 नगरसेवकां मदीं 1 गोवा फॉरवर्डाचो
दिगंबर कामत हांणी भाजपांत कायदेशीर प्रेश केलो, पूण तांचे समर्थक आशिल्ले मडगांव पालिकेच्या नगरसेवकांनी प्रवेश करूंक नाशिल्लो. ताका लागून आयतारा मुख्यमंत्र्याचे हाजिरेंत पक्षाची शाल घालून तांकां पक्षांत प्रवेश दिलो. ह्या 8 नगरसेवकां मदीं राजू नायक हे गोवा फॉरवर्डाचे नगरसेवक आशिल्ले. तांणी गोवा फॉरवर्ड पक्षाक सोडचीट दिवन भाजपांत प्रवेश केलो. दिगंबर कामत हांच्या गटांतले दामोदर शिरोडकार, दामोदर वरक, दिपाली सावळ, सिद्धांत गडेकार, सुगण नायक, लता पेडणेंकार, सेन्ड्रा फर्नांडीस ह्या 7 नगरसेवकांचो आस्पाव आसा.
गोवा फॉरवर्डाचे अध्यक्ष विजय सरदेसाय हे सत्ता नाशिल्ल्यान निरशेल्यात. ते स्वताक आपघोशीत विरोधी पक्ष फुडारी समजतात. सरकार खूबशे बरे निर्णय घेत आसा. पीएफआयचेर कारवाय केली, आतां गोंयांत सहकार्य करपी कांय राजकारण्यांचेर कारवाय करतले. तशेंच जे धर्मांतरण करतात तांचेर कारवाय सुरू आसा. ड्रग्ज तशेंच हेर बेकायदो घोटाळ्यांत वांटेकार आसात तांचेर कारवाय सुरू आसा. सरकार बरे काम करीत आशिल्ल्यान विजय सरदेसाय निरशेल्यात अशें दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
