भांगरभूंय | प्रतिनिधी
भांगरभूंय प्रतिनिधी
पणजी : हरीत उर्जा निर्मणेच्या प्रक्रियेंतल्यान गोंयांत 15 हजार नोकऱ्यो तयार जातल्यो. तशेंच सौर उर्जा आनी वाऱ्या सावन उर्जा निर्मणी प्रक्रियेंतल्यान वर्साक 500 नोकऱ्यो तयार जावपाची तांक आसा. हरीत उर्जा निर्मणी कडेन राज्याची वाटचाल सुरू आसा. 2050 मेरेन सगल्या वाठारांनी 100 टक्के अक्षय उर्जा मेळटली, असो विस्वास मुख्यमंत्री डॉ. प्रमोद सावंत हांणी उक्तायला.
सीआयआय गोंय फांट्या वतीन शुक्रारा अक्षय उर्जेचेर आदारीत परिशद जाली. परिशदेच्या उक्तावणा उपरांत मुख्यमंत्री डॉ. प्रमोद सावंत उलयताले. वीज क्षेत्रांत राज्य स्वयंपूर्ण ना. विजे खातीर राज्य हेर राज्यांचेर निंबून आसा. आतां सौर उर्जा आनी हरीत उर्जा निर्मणी कडेन राज्याची वाटचाल सुरू आसा. हातूंतल्यान विजेची गरज भागतलीच, तशेंच नोकऱ्यो लेगीत तयार जातल्यो. 2050 मेरेन सगल्या वाठारांनी अक्षय उर्जा उपलब्ध जातली. गोंय सरकारान ही मोख दवरल्या. येरादारी, नुस्तेमारी, शेती, उद्देग ह्या वाठारांतली म्हायती एकठांय करून सरकारान वीज निर्माण करपा खातीर कृती आराखडो तयार केला. उर्जा निर्मणेच्या आराखड्याची बेगिनूच कार्यवाही जातली. ह्या आराखड्याक लागून जी हरीत उर्जा तयार जातली, तातूंतल्यान 15 हजार नोकऱ्यांची निर्मणी जातली.
हरीत उर्जा निर्मणी प्रकल्प स्थापन करपाक गोंय सरकारान आयआरईडीए कडेन समजिकाय कबलात (एमओयू) केल्या. ह्या प्रकल्पाची बेगिनूच कार्यवाही जातली. शेती सयत गांवगिऱ्या वाठारांत वीज दिवपा खातीर ह्या प्रकल्पाचो उपेग जातलो.
खासगी कंपनींनी अक्षय उर्जा प्रकल्प स्थापन करपा खातीर सरकाराक सहकार्य करपाची गरज आसा. गोंय बेगिनूच हरीत उर्जेचें राज्य जातलें, अशें मुख्यमंत्री डॉ. प्रमोद सावंत हांणी सांगलें.
सीआयआयचे परिशदेंत हरीत उर्जा, हरीत उर्जा प्रकल्प, सौर उर्जा निर्मिती आनी तंत्रज्ञानाचेर चर्चासत्रां जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
