भांगरभूंय | प्रतिनिधी
म्हापशें: हणजूण दर्यादेगेर सीआरझॅड आनी हेर नेम खुंटयाळ्याक लावन भरती रेशे पसून 2 मिटरा भितर बांदिल्ल्या भारतीय पॉप गायक मिखा सिंगाच्या त्या बेकायदो बांदकामाची आयज (शुक्रारा) सकाळीं 11 वरांचेर पळोवणी करतले. हणजूण कायसूव पंचायतीन पळोवणी करपाचो वेळ निश्चीत करपी नोटीस जारी केल्या.
सेंट मायकल वाडो हणजूण्यां सर्वे क्रमांक 603-1त सुरू आशिल्ल्या बेकायदो बांदकामा आड थळावे समाजीक कार्यकर्ते रवी हरमलकार आनी गॅम्बीनो ड्रागो हांणी पंचायती सयत हेर संबंदितां कडेन कागाळ दाखल केल्ली. उपनगर नियोजक म्हापशें, उपजिल्होधिकारी बार्देस आनी सीआरझॅडचे वांगडी सचीव हांकां कागाळीचें पत्र दिल्लें.
दर्याचे भरती रेशे पसून अवघ्या दोन मिटर अंतरांत हें बांदकाम करून गोंय जमीन महसूल कायदो, सीआरझॅड कायदो, नगर नियोजन कायदो आनी पंचायत राज कायद्याचें उल्लंघन केल्ल्याचो आरोप हे कागाळींत कागाळदारांनी केला.
ह्या कागाळीच्या आदारान फाटल्या 21 मे दिसा पंचायतीन बांदकाम करपी मिखा सिंग उर्फ अम्रीक सिंग हाका काम बंद दवरपाची नोटीस दीत 24 मे दिसा पळोवणी करपाची वेळ थारायिल्ली. पूण ही पळोवणी जावंक नाशिल्ली. ताका लागून पंचायतीन बिरेस्तारा 9वेर नोटीस जारी करून पळोवणेची नवी तारीख निश्चीत केली. ही पळोवणी 10वेर सकाळीं 11 वरांचेर जातली. ह्या वेळार कागाळदार आनी बांदकाम करप्यान हाजीर रावचें अशी सुचोवणी पंचायतीन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
