भांगरभूंय | प्रतिनिधी
भांगरभूंय । प्रतिनिधी
वाळपयः भारतीय स्वातंत्र्याच्या अमृत महोत्सवी वर्सा निमतान सत्तरी तालुक्यांतल्या 10 हजार घरांचेर तिरंगो लायतले. तशेंच 14 ऑगस्टाक वाळपय आनी पर्यें मतदारसंघात तिरंगा रॅली काडटले. हे विशीं जाल्ले बसकेंत हो निर्णय घेतला. भलायकी मंत्री विश्वजीत राणे आनी पर्येची आमदार दिव्या राणे हांणी बसकेंत मार्गदर्शन केलें.
दोनूय मतदारसंघांतल्या दरेकी पांच मेळून 10 हजार घऱांचेर तिरंगो लावपाचें थारलां. भाजपाच्या मतदान केंद्र समित्यो, मंडळ समित्यो, भाजपा कार्यकर्ते तिरंगो लावपाचे मोहिमेंत वांटेकार जातले. साबार लोकांनी तातूंत वांटेकार जावचें अशें राणे हांणी मागलां. राजकीय पक्षांनी एकठांय येवून जात-पात तशेंच धर्म कुशीक दवोरून राष्ट्रभक्तीची ज्योत पेटोवपाक मजत करची अशें आवाहन तांणी केलां.
14 ऑगस्टाक जावपी तिरंगो रॅलीचें वाळपय मतदारसंघान विश्वजीत राण आनी पर्यें मतदारसंघांत आमदार दिव्या राणे फुडारपण करतली. घऱांचेर लावपा खातीर तिरंगे आयोजक दितले, बसकेक वाळपयची नगराध्यक्ष सेहझीन शेख, नगरसेवक सर्फराज सय्यद, अनिल काटकार, रामदास शिरोडकार, शराफत खान, प्रसन्न गांवस, विनोद हळदणकार हाजीर आशिल्ले. विनोद शिंदे हांणी तिरंगा रॅलीची म्हायती दिली
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
