भांगरभूंय | प्रतिनिधी
संगीत कोणाक आवडना? संगीत मनश्यांक, प्राण्यांक मानसिक स्वास्थ्य प्रदान करता. संगीताची धून कानार पडटांच आमच्या मुखामळार जें समाधान दिसता तें आमकां तणाव, दुख्खांतल्यान भायर काडूं शकता. अश्याच एका संगीत कार्यक्रमांचीं सुत्रां सांबाळपाची संद म्हज्या म्हऱ्यांत आयली. तिचें भांगर करचें, अशें मनांत आयलें. म्हाका ही संद दिवपी आशिल्ले गोंयचे नामनेचे संगीतकार रामानंदबाब रायकार. ही संद म्हाका दिल्ली घेवन गेली.
गोंयांक संगीताचें व्हडलें दायज. साबार कलाकार हांगा जल्मल्यात. गोंयांक तांणी नांव मेळोवन दिलां. तातूंतलेंच एक रत्न, कलासक्त व्यक्तीमत्व म्हणल्यार रामानंदबाब. फाटलीं 55 वर्सां परस चड काळ तांणी कोंकणी संगीताक योगदान दिलां. आंतरराष्ट्रीय मळाचेर पाविल्ले ते पयले गोंयकार संगीतकार. आमी दिल्ली सादर केली, ती तांची 35 वी कलाकृती. तांकां 22 पुरस्कार फावो जाल्यात. गोंय राज्य सांस्कृतीक पुरस्कारुय तांकां मेळ्ळा. भोवतेक राज्यांनी तांणी कोंकणी संगीत पावयलें. ही संगीत कार्यावळ आशिल्ली, “गीत गोंयचे अस्मितायेंचें”. स्वातंत्र्याचो अमृत महोत्सव आनी गोंयचे मुक्तीक साठ वर्सां पूर्ण जाल्ले निमतान ही कार्यावळ दिल्लींत जाली. स्वरश्री- गोंय हे संस्थेन आनी सरकाराच्या कला- संस्कृती संचालनालयान ती पुरस्कृत केल्ली. दीपक वेरेंकार हांची गोंयकारांचो एकवट संस्था आनी फादर आग्नेल इन्स्टिट्यूटाच्या पालवान आमी ती सादर केली. तातूंत गोंयची गाथा कथन करपी गीतां, कवितांचेर ती आदारित आशिल्ली. वरिष्ठ लोककला अभ्यासक, पखवाज वादक डॉ. मलबाराव सरदेसाय हांकां आनी भारतीय लश्कराक ही कार्यावळ ओंपिल्ली. प्रसिद्ध उद्देजक संदेश कुंडयकार हांचो हे कार्यावळींत मोलाचो वांटो आशिल्लो. मलबाराव सरदेसाय हांचे ते नातू.
राजधानी दिल्लींत ही कार्यावळ जाता, हाची खोस दरेका कलाकाराक आशिल्ली. तयारी बेस बरी जाल्ली. 18 डिसेंबर 2022 दिसा दिसा सांज वेळार आमची कार्यावळ आशिल्ली. पयसुल्लो रेल्वे प्रवास करुन वेळार पावपाचें आशिल्लें. 16 डिसेंबराक दनपरां दोनाक गोवा एक्सप्रेस आशिल्ली. रेल्वेचो प्रवास बरो जालो.
सगळी पूर्व तयारी कार्यक्रम विभागाचे वांगडी गौरीशबाब वेर्णेकार हांणी केल्ली. रंगमाची, दृष्याची सजावट आनी बाकी नेपथ्य. ते नामनेचे चित्रकार. नाटक, गायन, संगीत दिवप हें तांचें आवडीचे कलागुण. तांकां ताचे कलाकारी खातीर राज्या बरोबर राष्ट्रीय पुरस्कार मेळ्ळ्यात. दिल्लींत आमचो मुक्काम गोवा निवासांत आशिल्लो. आमी सकाळीं कुडकुडत सामाना सकट देंवलीं. दीपक वेरेंकार आमच्या येवकाराक हजर आशिल्ले. तांणी रामानंदबाबांच्या गळ्यांत फुलांचो हार घालून येवकार दिलो. आमची रावपाची, जेवणा – खाणाची वेवस्था बरी आशिल्ली.
आमचे कलाकार आशिल्ले, दिप्ती शेणवी कुंडयकार, आदी गौरीश वेर्णेंकार, मंगेश शेट्ये, दिनेश पै आंगले. निवेदक प्रमोद सुर्लेकार आनी हांव सोनाली. योगिता वेर्णेंकार हांची निवेदक म्हूण साथ मेळ्ळी. वादक कलाकार आशिल्ले, शैलेश साळगांवकार (ऑक्टोपेड), अतुल गुरव (ऑक्टोपेड, ढोलक), साईराज केरकार (तबला), राजेन्द्र परब (हार्मोनियम), नवसो नायक (कीबोर्ड), जितेन्द्र तांडेल (गीटार). गोंयच्या पाच न्हंयांचें (मांडवी, जुवारी, साळ, कुशावती, म्हादय) हांचें पवित्र उदक व्हरून अभिनव पद्दतीन पुष्पांजली, दिवली पेटोवन, मलबाराव हांचे प्रतिमेक फुलां हार अर्पण करून कार्यावळीक सुरवात केली.
मुखेल सोयरे म्हूण दिल्ली पुलिसांचे उपायुक्त आत्माराम देशपांडे, फादर ब्रिटो (फादर आग्नेल संस्थेचे प्राचार्य), फादर कारवेला (संस्थेचे वेवस्थापक) हांणी मोलाचीं उतरां सांगून कलाकारांक उर्बा दिली. आमच्या प्रत्येक गिताक दिल्लींतल्या गोंयकारांनी, दिल्लीकारांनी बरी साथ दिली. ‘गीत गोंयचे अस्मितायेचें’ हो ल्हान पूण म्हान कोंकणी संगीत कार्यक्रम करून थंयच्या लोकांची आमीं मनां जिखलीं. रामानंदबाब हांचे सारके संगीतकार आनी आमचे सगले कलाकारा हांकां नमन.
सोनाली सु. पेडणेंकार
[email protected]
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
