स्मिथ, लाबशेन हांचे आकर्शक शेंकडे

भांगरभूंय | प्रतिनिधी

येजमान आनी ऑस्ट्रेलिया ह्या पंगडां मदीं गॉल आंतरराष्ट्रीय स्टेडियमाचेर कालच्यान दुसरे टॅस्टीक सुरवात जाली. पयली मॅच 10 विकेटींनी जिखून माळेंत 1-0 अशी आघाडी घेवपी ऑस्ट्रेलियेन काल टॉस जिखून पयलीं बॅटींग करपाचो निर्णय घेतलो.

मार्नस लाबशेन आनी स्टीव स्मिथ हांणी पयल्या दिसा शेंकडे मारून मुखेली पॅट कमिन्साचो बॅटींग करपाचो निर्णय योग्य थारायलो.

पयल्या दिसाचो खेळ सोंप मेरेन ऑस्ट्रेलियेन 5 विकेटी वगडावन 298 धांवड्यो केल्यो. स्मिथ 109 आनी अॅलेक्सी कॅरी 16 धांवड्यो करून खेळपट्टीचेर आसात.

ऑस्ट्रेलियेची सुरवात बरी जाली ना. 14 धांवड्यांचेर आक्रमक बॅट्समन डॅव्हीड वॉर्नर (5) रजिथाच्या बॉलाचेर बोल्ड जालो. ते उपरांत उस्मान ख्वाजा (37) हाणें मार्नस लाबशेना वांगडा मेळून 55 धांवड्यांची भागिदारी केली.

ख्वाजा बाद जाल्या उपरांत लाबशेनान स्मिथा वांगडा मेळून चवथे विकेटी खातीर 134 धांवड्यांची भागिदारी केली. हे मजगतीं, लाबशेनान टॅस्ट कारकिर्दींतलो 7वो शेंकडो पुर्ण केलो. ताणें 12 चवक्यांचे मजतीन 104 धांवड्यो केल्यो. अखेरेक ताका प्रभात जयसुर्यान स्टम्प बाद केलो.

लाबशेन बाद जाल्या उपरांत ट्रॅव्हीस हेड (12) आनी क्रिस ग्रीन (4) हांकां स्मिथाक योग्य साथ दिवपाक जमली ना. दोगांकूय जयसुर्यान बाद केले. दुसरे वटेन स्मिथान विकेट पडपाक दिली ना आनी आपलो 28वो टॅस्ट शेंकडो पुर्ण केलो.