भांगरभूंय | प्रतिनिधी
ट्रॅव्हल विथ ज्यो… यू ट्यूब चॅनला वरवीं भारता भायर, खास करून पाकिस्तान आनी चीनांत भोंवडी करपी ज्योती मल्होत्राक
देशद्रोहाच्या आरोपा खाला ताब्यांत घेतलां. भारतांतली म्हत्वाची म्हायती पाकिस्तानाक पावयल्या म्हूण तपास अधिकाऱ्यां कडेन पुरावे आसात. पुरी देवळाच्या वाठाराचो व्हिडियो केल्लो तेन्ना सावन ती गुप्तहेर यंत्रणेच्या रडाराचेर आयली. ताचें पयली पाकिस्तानांत वचून आयली, थंयचें व्हिडियो केले म्हूण तिचेर नदर आशिल्लीच.
ज्योती मल्होत्रा ही मोहमायाची बळी म्हणूं येता. सोशल मिडियाचेर फामाद जावपाक आयज तरणाटे खूब यत्न करतात. खुबश्या जाणांक नांव आनी पयसो मेळटा. तशेंच खुबश्या जाणांक मेळना. ज्योतीक तिच्या ट्रॅव्हल स्टोरींक लागून चड नामना मेळूंक ना. तशेंच यू ट्यूबा वयल्यानूय चडशे पयशे मेळूंक ना. पूण तिची विदेश भोंवडी मात चालूच आशिल्ली. पाकिस्तानांत तर ती 3 फावटी वचून आयल्या. चीन, बांगलादेश, भुतान, तिबेट, सावदी अश्या कितल्याश्याच देशांची तिणें भोंवडी केल्या. आतां ह्या भोंवड्यां खातीर तिचे कडेन पयसो आयलो खंयच्यान? भारताच्या गुप्तहेर यंत्रणेन तिचेर नदर दवरून ती कितें तरी चुकीचें करता हें सोदून काडलें, आनी उपरांतूच तिका अटक केली.
ज्योती मल्होत्राचो यू ट्यूब चॅनल ट्रॅव्हल विथ ज्यो… चो नियाळ घेतलो तेन्ना हो चॅनल सुरू जावन चड वर्सां जावंक ना, हें म्हाका दिसून आयलें. कोविडाचें अरिश्ट सोंपले उपरांत तिचो हो चॅनल सुरू जाला. सुरवेक जे व्हिडियो केल्ले ते 2-3 मिणटांचे, 8 मिणटांचे आसात. तशेंच ताका व्ह्यू चड नात. ही ज्योती मल्होत्रा कोण काय म्हूण पळोवपाक खुबश्या जाणांनी व्हिडियो आतां खंय तरी चलयल्यात तेन्ना हे व्ह्यूज वाडल्यात. जाल्यार फुटकळ व्ह्यूज आशिल्ली ही यू ट्यूबर देशांत आनी देशा भायर भोंवडी करून गिरेस्त जीण कशी जगता काय म्हूण कोणाकूय प्रस्न पडपाचोच.
कोविडाच्या अरिश्टा वेळार प्रायव्हेट कंपनींनी, आस्थापनांनी वा स्टोरांनी काम करपी खुबश्या जाणांची नोकरी गेली. तातूंत ज्योतीचोय आस्पाव आशिल्लो. तिचे घरची परिस्थिती तशी सादारणूच. ताच्या बापायची मुलाखत आयकली तेन्ना तो स्वता ताच्या भावाच्या पेंशनाचेर आसा म्हूण कळ्ळें. तशेंच ज्योती खंय कितें करता तें आपल्याक खबर ना, दिल्ली वता म्हूण सांगून पाकिस्तानाक गेली, अशी ताची जाप आसा. आयज सोशल मिडियाचेर कर्मां करपी भुरगीं घरच्यांक तशेंच व्हडलेंशें कांयच सांगिनात. तशेंच यू ट्यूबार व्हिडियो करून पयशे मेळटात आसतलें, अशें म्हणून ज्योतीच्या बापायनूय आडनदर केल्या आसतलीच. आतां भारतांतली गजाल सोडा, गोंयांतूच कितलिंशींच भुरगीं फेसबूक, यू ट्यूब चॅनल उक्तीं करून बसल्यात. थंय ती कितें पोस्ट करतात ताचेर तांच्या पालकांची कितली नदर आसा? हय, हो जण एकल्यान स्वताक वा अश्या भुरग्यांच्या पालकांक प्रस्न विचारचो. एक जागृत नागरीक म्हूण विचारपाचो हक्क आसा. सोशल मिडियाचेर फामाद जावपा खातीर भुरगीं खंयचो मार्ग आपणायतात, खंय वतात, कितें करतात, कोणाचो आदार घेतात हें जाणून घेवप पालकांचें कर्तव्य आसा.
आयच्या आधुनीक काळांत झूज फक्त रणभुंयेर वा शिमेचेरूच जाता अशें ना. आयज झूज सायबर, सोशल मिडिया वयल्यानूय जाता. सोशल मिडियाचेर एखादी चिथावन घालपी पोस्ट आयल्यार त्या-त्या पोस्टा कडेन संबंद आशिल्लो थारावीक लोक फाटीं फुडें पळयनासतना बोवाळ घालपाक सुरवात करता. तशेंच सोशल इन्फ्लुएन्सरांच्या माध्यमांतल्यान एखाद्याची बदनामी करप, एखाद्या सुवाते विशीं चुकीची म्हायती पातळवप होवूय एके तरेचो हल्लोच आसा. पाकिस्तानांत वचून पाकिस्तानांत भोंवपाक बरें आसा अशी वातावरण निर्मिती एका भारतीय अस्तुरेन आनी तेंय बी हिंदून सांगप म्हणल्यार संवसारा मुखार पाकिस्तानाची बाजू घटमूट करपाचो हो प्रकार आसा.
पाकिस्तानान भारता आड वेगळ्या वेगळ्या पद्दतीन झूज सुरू केलां. आतंकवाद हो शिमेरूच न्हय तर भारताच्या शिमे भितरूय पावला. तातूंतच झटपट पयशे जोडपाक सोदपी तरणाट्यांक, खासा करून सोशल मिडिया इन्फ्ल्युएन्सरांक गळाक लावन तांचे कडल्यान आपली कामां तडीक लावपाचोय तांचो आधुनीक प्लॅन आसा. भारताच्या गुप्तहेर यंत्रणेन हो प्लॅन वळखून आतां अश्या देशद्रोही यू ट्यूबर, सोशल मिडिया इन्फ्ल्युएन्सरांक धरप सुरू केलां. आयज भारतांत अशी एकूच ज्योती ना, कितल्योश्योच आसतल्यो आनी हेर तरणाटे आसतले. भारताच्या गुप्तहेर यंत्रणेच्या रडाराचेर ते आसतलेंच. भारताची रक्षा प्रणाली इतली घटमूट आसा की देशा भायल्या दुस्मानांक जमीन दाखयतलेच, देशा भितर आशिल्ल्यांकूय सोदून काडटले.
पहलगाम हल्ल्या पयलीं ज्योती पाकिस्तानी अधिकाऱ्यां बरोबर दिशिल्ली. तशेंच पाकिस्तानांत जावपी तिर्थयात्रेक भारतांतल्यान फक्त 154 जाणांक परवानगी मेळिल्ली, तातूंतय तिचो आस्पाव आशिल्लो. म्हणटकच तिका केदो मोटो फावोर आशिल्लो तें पळयात. भारत-पाकिस्तान शिमेर ती सहज व्हिडियो करीत भोंवता, कोणूच ताका हटकी ना. पाकिस्तानांत तर ती राणये भशेन भोंवता, इतली ताची ते जतनाय घेताले. केन्ना पळोवंक ना इतलो पयसो पाकिस्तान्यांनी ताका दाखयला आसतलो, तें भुल्लां आसतलें आनी देशद्रोह करून बसलां आसतलें.
भारताचे रक्षा अधिकारी सांगता ते प्रमाण तिचो भारताच्या रक्षा प्रणाली कडेन कांयच संबंद नाशिल्लो, तेन्ना तिचे कडेन तशी व्हडली म्हायती आसची ना. पूण, तांचे नदरेन जी सादी गजाल आसतली, ती गजाल पाकिस्तानाक खूब व्हड थारपाक शकता.
ज्योती आनी ताचे वांगडा धरिल्ल्या 5 जाणांची चवकशी सुरू आसा. मजगतीं, आनीक धायेक जाणांक ताब्यांत घेतल्यात. आयज आधुनीक झुजांत भारताक भायल्यां वांगडांच न्हय तर देशांतल्या अश्या देशद्रोह्यां कडल्यानूय धोको आसा. तेन्ना, कोणूय अनवळखी वा 4 दिसांची वळख जाल्ल्यांक कसलीय म्हायती दितना जण एकल्यान धा फावटी तरी विचार करपाकूच जाय.
ज्योतीन प्रवास करतना खंयच्या शारांतली कसली म्हायती पाकिस्तानाक पावयल्या, ताचो सोद चालू आसा. धरिल्ल्या हेरां कडल्यानूय म्हायती एकठांय करप सुरू आसा. पाकिस्तानान कसलीय प्लॅनींग करूं, भारता मुखार तांची दाळ शिजची ना, हें मात खरें.
अमर पाटील
7507495151
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
