भांगरभूंय | प्रतिनिधी
भांगरभूंय । प्रतिनिधी
पर्वरीः रस्त्यांची चड अपघात सोरो पियेवन वाहना चलयल्ल्यान जातात. सोरो पियेवन तायट जाल्ल्या आपल्या गिरायकांक तांच्या घरा पावोवपाचें काम बार आनी रेस्टॉरन्टवाल्यांनी आपली जापसालदारी म्हणून करपाक जाय. तशी कायदेशीर तजवीज करपा खातीर मुख्यमंत्र्या कडेन चर्चा करतलो, अशें येरादारी मंत्री माविन गुदिन्हो हांणी सांगलां. पर्वरी हांगा 11व्या रस्तो सुरक्षा सप्तकाचें उक्तावण केल्या उपरांत ते उलयताले. कार्यावळीक पर्यटन मंत्री रोहन खवंटे, सरकाराचे येरादारी सचीव सुभाषचंद्र, येरादारी खात्याचो संचालक राजन सातर्डेकार आनी गोवाकॅनाचो संयोजक रोनाल्ड मार्टिन हाजीर आशिल्ले.
सुशेगादीन वाहन चलोवपा खातीर म्हामार्ग केल्यात. कश्याकशी वाहनां चलोवन अपघात करपाक न्हय. सुरक्षा हें दरेका वाहन चालकाचें लक्ष्य आसपाक जाय. सोरो पियेवन वाहनां चलयतल्यांक खर कारवाय करपाक सुरवात केल्या. रेन्ट अ बायकवाले दुचाकी चलयतल्यांक हेल्मेटा दिनात ही गजाल सामकार आयल्या. हाचे फुडें हेल्मेटां दाखयल्यारूच तांकां परमिटां दितले अशें गुदिन्हो हांणी सांगलें.
सुरक्षीतपणान वाहनां चलोवपा खातीर लोक जाग्रुताय करपाची गरच आसा. साडय मारप वा स्पिडीन वाहना चलोपाच्या प्रकारां लागून अपघात जातात आनी तातूंत वाहनचालक मरतात. येरादारीचे नेम मोडटल्यांचेर येरादारी खात्याच्या अधिकाऱ्यांनी कारवाय करपाक जाय अशें रोहन खवंटे हांणी सांगलें. अपघातांत वाड जायत आसा ताका लोकूय तितलेच जापसालदार आसात.कांय लोक दर्या देगांनी वाहना चलोवपाक लागल्यात. हें सामकेंच अती जालां अशें तांणी फुडें सांगलें.
सुरवेक माविन गुदिन्हो हांणी दिवली पेटोवन रस्तो सुरक्षा सप्तकांचें उक्तावण केलें. येरादारी संचालक राजन सातर्डेकारान हाजीर आशिल्ल्यांक येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
