भांगरभूंय | प्रतिनिधी
घरच्यांचो आरोप, प्रकरण सीबीआय कडेन दिवचें; फोगट हिचो सचीव, इश्टा आड कागाळ
भांगरभूंय I प्रतिनिधी
म्हापशेंः भाजप फुडारी आनी टीकटॉक स्टार सोनाली फोगट (43) हिच्या मरणान आतां वेगळें मोडण घेतलां. सोनाली हिच्या मरणा फाटल्यान घातपात वा जेवणांतल्यान विखबादा करून जाल्ल्याचो दुबाव तिचो भाव रिंकू ढाका हांणी उक्तावन हे प्रकरणांत हणजूण पुलिशेंत कागाळ दाखल केल्या. तांणी सुधीर सांगवान आनी सुखविंदर पाल सिंग हांचेर दुबाव उक्तायला. तशेंच ह्या प्रकरणाची सीबीआय चवकशी करची अशी मागणीय तांणी केल्या.
सोनाली फोगट हिच्या कुडीच्या पोस्टमार्टेमा खातीर गोंय मेडिकल म्हाविद्यालय आनी हॉस्पिटलान तीन वांगड्यांच्या दोतोरांची नेमणूक केल्या. तशेंच पोस्टमार्टेमाचें व्हिडियो चित्रिकरण जातलें. कुटुंबियांच्या परवानगी उपरांत बिरेस्तारा कुडीचो पोस्टमार्टेम जावपाची शक्यताय आसा.
मजगतीं, घातपाताच्या तशेंच खूनाच्या दुबावाच्या कागाळे उपरांत दोनूय दुबावितांची रातीं उसरां मेरेन पुलीस चवकशी करताले.
मंगळारा हणजूणेंत सोनाली फोगट हिका आताकाच्या धपक्यान दुबावीत मरण आयिल्लें. पुलिसांनी सैमीक मरण अशें पंचनाम्यांत नोंद करून कूड गोमॅकाँच्या मड्याकूडींत दवरल्या. कुडीचो बुधवारा पोस्टमार्टेम जावपाचो आशिल्लो. ते खातीर फोगट हिचे कुटुंबीय गोंयांत दाखल जाल्यात.
फोगट हिचो भाव रिंकू ढाका हांणी हणजूण पुलिशेंत लेखी कागाळ करून हो खूनाचोच प्रकार आशिल्ल्याचो दावो केला. आपले भयणीक तांचो स्वीय सचीव सुधीर सांगवान आनी इश्ट सुखविंदर पाल सिंग हांणी जेवणांत विख घालून मारिल्ल्याचे कागाळेंत नमूद केलां. हो पूर्वनियोजीत खूनाचो प्रकार आसा, असो दावो करून ढाका हांणी दोगां आड ही कागाळ दाखल केल्या.
दुबावीत सुधीर सागवान हाणें तीन वर्सां पयलीं आपले भयणीचेर लिंगीक अत्याचार केल्ले. ह्या अत्याचाराचे ताणें व्हिडियो चित्रीकरण केल्ले. तशेंच दुबावीत तिका धमकी दिवन तिचेर अत्याचार करतालो. ब्लॅकमेलींग करून आपणाक जाय तें काम करून घेतालो. ताणेंच जेवणांत वीख घालून तिचो खून केल्ल्याचो आरोपूय ढाका हांणी कागाळेंत केला.
तीन म्हयन्यां पयलीं आपले भयणीन आपणाक फोन करून दुबावीत सुधीर हो तिका वखदांतल्यान विख घालून दितां, अशें सांगिल्लें. ते भायर लिंगीक अत्याचाराचो प्रकार तिणें आपल्या भावोजीक सांगिल्लो, अशें कागाळेंत नमूद केलां.
बुधवारा फिर्यादी रिंकू ढाका आनी तांच्या घरच्यांनी हणजूण पुलीस स्टेशनांत पुलीस अधिक्षक शेखर प्रभुदेसाय आनी हेर कनिश्ठ अधिकाऱ्यां कडेन चर्चा केली. ते उपरांत तांणी ही कागाळ दाखल केल्या.
सोनाली फोगट ही भाजपाची सक्रीय कार्यकर्ती आशिल्ली. ताका लागून ह्या प्रकरणांत भाजपाच्या वरिश्ठ फुडाऱ्यांनी आनी प्रधानमंत्री नरेंद्र मोदी हांणी लक्ष घालून तिका न्याय मेळोवन दिवचो, अशी मागणी रिंकू ढाका हांणी केली.
हो पूर्वनियोजीत कट
मंगळारा सांजे आपूण गोंयांत आयला. आपणें चवकशी केले उपरांत सोनाली हिचो खून जाल्ल्याचे समजले. हो घातपात आनी पूर्वनियोजीत कट आसा. हातूंतल्या दुबावितांचीं नांवां आपूण पुलिसांक दिल्यात. हो पूर्वनियोजीत कटाचो प्रकार आसा. आपलो जीव धोक्यांत आसून तशी कागाळ सोनाली हिणें आपले कडेन आनी कुटुंबियां कडेन फोनाचेर उलयतना केल्ली. तिच्या मरणा पयलीं तिचो आमकां फोन अायिल्लो अशें ढाका हांणी सांगलें. गोंयांतल्यान परत आयले उपरांत दोगां आड हिस्सार पुलिशेंत कागाळ करूंया, अशें सांगिल्लें. पूण ताचे पयलीच तिचो खून जालो, असो आरोप ढाका हांणी केला.
कागाळ करूनूय दुबावितांचेर कारवाय जायना
विखबादा करून आपली भयण सोनाली फोगट हिचो खून केला. ह्या खूना फाटल्यान सोनाली फोगट हिचो निजी सचीव सुधीर सांगवान आनी इश्ट सुखविंदर सिंग हांचोच हात आसा. हे विशीं आपणें पुलिशेंत कागाळ दाखल केल्या. पूण पुलिसांनी अजून मेरेन दुबाविता आड कारवाय करूंक ना. गोंय पुलिसां कडल्यान आमकां सहकार्य मेळटलें, अशें दिसना. ते खातीर हे प्रकरण सीबीआय कडेन दिवचें, अशी मागणी तांणी केल्या, अशें रिंकू ढाका हांणी पत्रकारां कडेन उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
