भांगरभूंय | प्रतिनिधी
वेळ पडल्यार आमरण उपोशण; आंगणवाडी सेविकांची शिटकावणी
पणजी: बायलां आनी भुरगीं उदरगत खात्यान काडून उडयिल्ल्या गोवा युनियन ऑफ आंंगणवाडी वर्कर ह्या संघटणेच्या सात आंगणवाडी सेविकांनी बिरेस्तारा सावन आझाद मैदानार धरणें आंदोलन करपाचो निर्णय घेतला. सेवेंत जो मेरेन घेनात तो मेरेन आंदोलन सुरूच उरतलें, वेळ पडल्यार आमरण उपोशणाक बसपाची शिटकावणी ह्या अंगणवाडी सेविकांनी दिल्या.
फाटल्या वर्सा डिसेंबर म्हयन्यांत बेकायदो आंदोलन केल्ल्याचो ठपको दवरून ह्या अंगणवाडी संघटणेच्यो पदाधिकारी निलम पालयेंकार, देवयानी तामसे, ज्योती सांवड्डेंकार, विद्या नायक, रश्मीता नायक, खतीजा अटनेकार, पौर्णिमा गांवकार ह्या सात सेविकांक 4 एप्रील दिसा बायलां आनी भुरगीं उदरगत खात्यान काडून उडयिल्ल्यो. हाका लागून ह्या सेविकांनी मुख्यमंत्र्याची भेट घेवन सेवेंत घेवपाची मागणी केली. मुख्यमंत्री डॉ. प्रमोद सावंत हांणी तांकां सेवेंत घेवपाचें आस्वासन दिल्लें, पूण अजून तांकां सेवेंत घेवंक नात. मुख्यमंत्री सेवेंत घेवपाक इत्सूक आसात, पूण बायलां आनी भुरगीं उदरगत मंत्री आडायत आशिल्ल्याचें मुख्यमंत्र्यांनी ह्या सेविकांक सांगलें.
सद्या मुख्यमंत्री आनी बायलां आनी भुरगीं उदरगत मंत्री हांणी ह्या सेविकांचो फुटबॉल केला अशें ह्या वेळार संघटणेचे फुडारी हृदयनाथ शिरोडकार हांणी सांगलें.
ह्या सेविकांनी आपल्या हक्का खातीर तशेंच विवीध मागण्यां खातीर आंदोलन केल्लें. पूण उपरांत ह्या संघटणेच्या पदाधिकार्यांक फक्त टारगेट करतात. तांचे सुवातेर आतां नव्या सविकांची भरती करतात. ताका लागून ह्या सेविकांनी धरणें आंदोलनाक बसपाचो निर्णय घेतला. जो मेरेन सरकार ह्या सेविकांक सेवेंत घेना, तो मेरेन ह्यो सेविका आझाद मैदानार धरणें आंदोलनाक बसतल्यो. वेळ पडल्यार आमरण उपोशणूय करतल्यो अशेंय ह्या वेळार अॅड. हृदयनाथ शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
