भांगरभूंय | प्रतिनिधी
विजय सरदेसाय : कोयरा विशीं फातोड्डेंकारांक उलो
भांगरभूंय । प्रतिनिधी
मडगांव : मडगांव पालिके कडल्यान एसजीपीडीए मार्केटांतलो कोयर उखलिनात आनी ताचो त्रास फातोड्डेंकारांक त्रास जाता. मडगांव पालिका कोयर उखलिना जाल्यार आपूण कोयर उखलतां, पूण लोकांनी पालिकेक कर दिवपाचें बंद करचें, अशें आमदार विजय सरदेसाय हांणी सांगलें.
एसजीपीडीए किरकोळ मार्केटांत कोयर काडपा कडेन मडगांव पालिका आडनदर करता, हे खातीर आमदार सरदेसाय हांणी तिडक उक्तायली. सरकाराचें स्वच्छ भारत अभियान म्हणल्यार हेंच?, असो प्रस्न तांणी उपस्थीत केलो. सरदेसाय हांणी सांगलें, मडगांवची उदरगत करचे खातीर मडगांवचे आमदार भाजपांत गेले. मडगांवचे नगरमंडळ तांचेच आसा, पूण शाराचे नितळसाणींत अजून घाळपणां दिसतात. एसजीपीडीए मार्केटांत ज्यो कोयराच्यो राशी तयार जाल्यात, त्यो ताकतिकेन काडच्यो, ना जाल्यार आजगी यंत्रणे वरवीं आपूण ती सुवात नितळ करतलों. जर फातोड्डेंच्या लोकांक पालिके कडल्यान गरजेच्यो सेवा मेळनात जाल्यार लोकांनी पालिकेक कर दिवपाचो बंद करचो. आपूण मंत्री आसतना मडगांवचे एसजीपीजीए मार्केट दुबय मार्केटाचे तुळेचें केल्लें. मात आतां ताचे कडेन आडनदर जाता, हें मार्केट हप्ते वसूल करपाचो अड्डो जाला, असो आरोप सरदेसाय हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
