भांगरभूंय | प्रतिनिधी
बापायचो अर्जः न्यायालयीन कोठडेंत आनीक 14 दिसांची वाड
भांगरभूंय । प्रतिनिधी
पणजीः स्वताच्या चार वर्सां पिरायेच्या पुताचो खून केल्ल्याचो आरोप आशिल्ली बंगळुरूंतले आर्टिफिशियल इंटेलिजन्स कंपनीची संस्थापिका तशेंच सीईओ सूचना सेठ हिची मानसीक स्थिती सारकी ना. ते खातीर तिची परतून मानसीक तपासणी करची, असो अर्च तिच्या बापायन बाल न्यायालयाक सादर केला. ह्या अर्जाचेर पुलिसांक म्हणणें सादर करपाचे निर्देश न्यायालयान दिल्यात.
मजगतीं, सूचनाचे न्यायालयीन कोठडींत आनीक 14 दिसांची वाड केल्या.
सूचना सेठ हिणें 7 जानेवारीचे राती सिकेरी- कांदोळेच्या एका हॉटेलांत स्वताच्या चार वर्सां पिरायेच्या पुताचो खून केलो. ते उपरांत स्वताच्या हाताची शीर कापून आत्महत्या करपाचो यत्न केलो. पूण तिचो हो यत्न अपेशी जालो. ते उपरांत तिणें पुताची कूड बॅगेंत घालून गोंयांतल्यान रस्त्याच्या मार्गान बंगळुरू पळून वचपाचो यत्न केलो. पूण कळंगूट पुलिशेचे सतर्कतायेक लागून ती कर्नाटक पुलिशेचे तावडेंत सांपडली. ते उपरांत कर्नाटक पुलिसांनी तिका अटक करून गोंय पुलिशेचे सुवादीन केले उपरांत तिका पयली म्हापशेंच्या प्रथमवर्ग न्यायालयांत उबी केली. त्या वेळार न्यायालयान तिका स दिसांची कोठडी फर्मायली. हें प्रकरण भुरग्याच्या मरणा कडेन संबंदीत आशिल्ल्यान बाल न्यायालयान ह्या प्रकरणांत सुनावणी घेवन सूचनाक 31 जानेवारी मेरेन कोठडी फर्मायल्ली. ही कोठडी सोंपले उपरांत बुधवारा बाल न्यायालयांत उबी केली, तेन्ना तिचे कोठडेंत आनीक 14 दिसांची वाड केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
