भांगरभूंय | प्रतिनिधी
नागरी पुरवण खात्याचीं घाळपणांः 5 लाखां वयर लुकसाण
भांगरभूंय I प्रतिनिधी
पणजी : पेड्डेर तूरदाळीचो विशय राज्यांत गाजत आसतनाच आतां राज्यांतल्या इकरा गुदावांनी पडून अाशिल्लीं 10 मेट्रीक टन साकर पेड्डेर जाल्ल्याचे मुखार आयला. हे साखरेचो विलो लावपाक नागरी पुरवण खात्यान 28 जुलयाक जायरात जारी करून निविदा मागयिल्ल्यो. पेड्डेर जाल्ली साकर घेवपाक इत्सुकांनी 18 ऑगस्ट 2022 मेरेन निविदा जारी करच्यो. तेच दिसा सांजे 4 वरांचेर निविदा उक्त्यो करतल्यो, अशें जायरातींत नमूद केल्ले. ही साकर कोवीड काळांतूय हेर राज्यांतल्यान हाडिल्ली, अशी म्हायती गोपांनी दिली.
मजगतीं, कोवीड काळांत राज्यांत सगल्याच जिणेगरजेच्या वस्तूंचे दर वाडिल्लें. अशें परिस्थितींत नागरी पुरवण खात्याच्या आडनदरेक लागून 10 मेट्रीक टन गुदावांनी पडून उरली. त्या काळांत साकरेक आशिल्ल्या दराचो विचार केल्यार सुमार पांच लाख रुपया जातात. ही साखर उण्या दरान सवाय धान्य दुकानदारां वरवीं लोकां मेरेन पावोवप सहज शक्य आशिल्ले. पूण सरकार आनी प्रशासनांतल्या अधिकाऱ्यांच्या घाळपणाक लागून लाखांनी रुपयांची साकर पेड्डेर जाल्ल्याची म्हायती गोपांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
