भांगरभूंय | प्रतिनिधी
पणजी: भाजप फुडारी तशेंच अभिनेत्री सोनाली फोगटाच्या खून प्रकरणांतलो दुबावीत सुखविंदर सिंगान पणजेंतल्या उत्तर गोंय जिल्हो आनी सत्र न्यायालयांत जामीन अर्ज दाखल केला. ह्या अर्जाक सोनाली फोगटाचो भाव रिंकू ढाकान दाखल केल्ल्या हस्तक्षेप अर्जाक न्यायालयान परवानगी दिल्या.
सोनाली फोगट तिचे वांगडी सुधीर पाल सांघवा आनी सुखविंदर सिंग हांचे सयत 22 ऑगस्ट दिसा गोंयांत आयिल्ली. उपरांत ते सगले ग्रॅण्ड लिओनी हॉटेलांत देंविल्ले. दुसऱ्या दिसा म्हणल्यार 23 ऑगस्ट दिसा सोनाली फोगट हिका दुबावीत रितीन मरण आयिल्लें. ह्या प्रकरणांत फोगट हांचो भाव रिंकू ढाकाचे कागाळी उपरांत हणजूण पुलिसांनी खुनाचो गुन्यांव दाखल केलो. तिचो वांगडी सांघवा आनी सिंग ह्या दोगांक अटक केल्ली. उपरांत दोनूय दुबावितांक म्हापशेंच्या पयलो वर्ग न्यायालयान पुलीस कोठी दिल्ली. ती सोंपले उपरांत त्या दोगांकूय पुलिसांनी म्हापशेंच्या अतिरिक्त जिल्हो आनी सत्र न्यायालयांत हजर करतकूच तांकां न्यायालयीन कोठी दिली.
उपरांत हें प्रकरण केंद्रीय गुन्यांव अन्वेशण विभागा कडेन (सीबीआय) वर्ग केलें. ह्या प्रकरणांत सीबीआयच्या दिल्लीच्या विशेश विभागान भारतीय दंड संहितेच्या कलम 302, आरडब्ल्यू 36 आनी 34 खाला चवकशी सुरू करून तपास पुराय केलो. उपरांत सीबीआयन म्हापशेंच्या पयलो वर्ग न्यायालयांत सांघवा आनी सिंग ह्या दोनूय दुबावितां आड आरोपपत्र दाखल केले.
हें प्रकरण सत्र न्यायालयाच्या अधिकारक्षेत्रांत येत आशिल्ल्यान पणजेंतल्या उत्तर गोंय जिल्हो आनी सत्र न्यायालया कडेन वर्ग केलां. उपरांत दुबावितां मदल्या सुखविंदर सिंगान न्यायालयांत जामीन अर्ज दाखल केला. हाका सोनाली फोगटाचो भाव रिंकू ढाकान हस्तक्षेप अर्ज दाखल केला. ह्या प्रकरणांत न्यायालयान ढाका हाका हस्तक्षेप करपाक परवानगी दिल्या. ह्या प्रकरणाची फुडली सुनावणी 20 जानेवारीक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
