भांगरभूंय | प्रतिनिधी
आफ्रा मोंतेरो आनी हेरा आड गुन्यांव दाखल
म्हापशेंः सुकूर पर्वरे सुमार 43 हजार चौ. मि. जमीन बनावट कागदपत्रां तयार करून परस्पर आपल्या नांवार करपाचो प्रकार उक्ताडार आयला. ह्या प्रकरणांत म्हापशें पुलिसांनी आफ्रा लिओनिल्डो मोंतेरो (अंधेरी, मुंबय) आनी हेर अनवळखी व्यक्ती आड गुन्यांव दाखल केला.
फिर्यादी मार्ता पिंटो दो रोझारियो (सुकूर, आल्त पर्वरी) हिणें पुलिशेंत कागाळ दाखल केल्या.
फिर्यादीच्या सुकूर पर्वरेंतल्या सर्वे क्रमांक 204/3 तली 21,675 चौ. मी., सर्वे क्रमांक 227/13 तली 6,525 चौ. मी., सर्वे क्रमांक 227/24 तली 5,225 चौ. मी., सर्वे क्रमांक 230/3 तली 1,050 चौ. मी., सर्वे क्रमांक 231/1 तली 2,175 चौ. मी., सर्वे क्रमांक 235/4 तली 4,950 चौ. मी. आनी सर्वे क्रमांक 236/14 तली 1,275 चौ. मी. मेळून सुमार 43 हजार चौ. मि. जमनीची बनावट कागदपत्रां तयार करून हें जमनीचेर दावो केला.
म्हापशें उपनिबंधक कार्यालया वरवीं दुबावितांनी ही जमीन आपल्या नांवार हस्तांतरीत केल्या. तशेंच फटवणुकेच्या माध्यमांतल्यान फिर्यादी आनी तिच्या नातलगांचो हक्क बळकावन घेवन जमनींतल्यान मेळकत घेतल्या.
हो प्रकार फाटल्या मार्च 2021 पयलीं घडिल्लो. हे विशींची म्हायती मेळ्ळे उपरांत फिर्यादींनी आपल्या जमनी विशींचीं कागदपत्रां संबंदींत सरकारी यंत्रणे कडल्यान मेळयलीं. ह्या कागदपत्रां प्रमाण दुबावितांनी बनावट कागदपत्रां तयार करून फटवणूक करून जमीन बळकायिल्ल्याचे दिसून आयले. ते उपरांत फिर्यादींनी म्हापशें पुलिशेंत कागाळ नोंद केल्या.
हे कागाळेच्या आदारान पुलिसांनी दुबावीत आफ्रा मोंतेरो आनी हेरा आड भादंसं. च्या 465, 466, 468, 471, 419, 420, 255, 259, 260 आनी 34 कलमा खाला गुन्यांव दाखल केला. ह्या प्रकरणांत पुलीस निरिक्षक परेश नायक हांच्या मार्गदर्शना खाला उपनिरिक्षक आशिश पोरोब तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
