भांगरभूंय | प्रतिनिधी
एनआयओची निर्मिती; आतां हिंदी म्हासागराचो जातलो अभ्यास
भांगरभूंय । प्रतिनिधी
पणजी: तापमान, ओलसाण, उदकाची खारसाण तशेंच रिअल टायम डेटा दिवपा खातीर आतां एनआयओन तयार केल्ल्या सीबोटचो वापर जातलो. दोनापावलाचे एनआयओ संस्थेन उदकांत वचपी सीबोट वाहनाची निर्मिती केल्या. सीएसआयआरच्यो सचीव आनी म्हासंचालक डॉ. एन. कलयसेवी हांणी ही म्हायती दिली. ह्या वेळार एनआयओचे संचालक डॉ. सुनीलकुमार सिंग हाजीर आशिल्ले.
शास्त्रज्ञ आनी उद्देगीक संशोधन मंडळाच्यो (सीएसआयआर) म्हासंचालक डॉ. एन. कलयसेवी हांणी सोमारा पत्रकार परिशद घेतली.
तंत्रज्ञान तशेंच संशोधनांत (आर अॅण्ड डी) देश आत्मनिर्भर जावचो, म्हूण सीएसआयआर तशेंच एनआयओचे यत्न चालू आसात. एनआयओन गोंयांत हवामान तशेंच रीअल टायम डेटा दिवपी सीबोट हें उदकांत वचपी वाहन तयार केलां. हें वाहन कार्यान्वीत जालां. सध्या तयार केल्लें सीबोट (वाहन) 200 मिटर मेरेन खोल उदकांत वता. हजारांनी मिटर खोलायेच्या उदकांत वचपी सीबोट वाहन तयार करपाचे यत्न चल्ल्यात, अशें डॉ. सुनीलकुमार सिंग हांणी सांगलें.
तापमान, खारसाण, ओलसाण तशेंच प्रदुशणकारी घटकांची म्हायती सीबोटाक लागून मेळटली. उदकांत आशिल्लीं मिनां (मिनेरल्स) तशेंच जैवीक वनस्पतींच्या घटकांची म्हायती मेळटली. सीबोटच्या माध्यमांतल्यान हिंदी म्हासागरांतले घटक तशेंच हवामानाचो अभ्यास एनआयओ करतली. प्रशांत म्हासागर तशेंच आर्टीक म्हासागरचो अभ्यास खूबशे देश करतात. हिंदी म्हासागराचो अभ्यास फावो त्या प्रमाणांत जावंक ना. हिंदी म्हासागर भारता खातीर म्हत्वाचो आसा. हाका लागून एनआयओ हिंदी म्हासागराचो अभ्यास करतली.
सीबोट वांगडा उदकांत डायवर्स धाडपाची गरज ना. सीबोटाक कॅमेरा तशेंच हेर उपकरणां जोडून उदकांत सोडले उपरांत सगळो रियल टायम डेटा उपलब्ध जातलो. शेतकार, संशोधक, विद्यार्थी हांका ही म्हायती पुरक थारतली, अशें डॉ. कलयसेवी हांणी सांगलें.
तेलगुळ्यांचे समस्येचेर उपाय
बोटींतल्यान तेलाची गळटी जाले उपरांत तेलाचे तवंग खूब खेपे दर्यादेगांचेर येतात. दर्यादेगांचेर तेलगुळे (टारबॉल्स) तयार जावप ही गोंयांतली गंभीर समस्या आसा. तेलगुळ्यांचो रस्त्या सयत बांदकामाच्या साहित्या खातीर वापर करप शक्य आसा. हाचेर संशोधन सुरू आसा, अशें डॉ. कलयसेवी हांणी सांगलें.
तंत्रज्ञान आनी संशोधनांत देशाक आत्मनिर्भर जावपा खातीर सीएसआयआरान तरेकवार उपक्रम सुरू केल्यात. जिज्ञाना आनी हेर कार्यावळी खाला विद्यार्थी एनआयओक भेट दितात. विद्यार्थ्यां खातीर खासा उपक्रम सुरू जाल्यात. सीएसआयआरच्या यत्नांक लागून जम्मू काश्मीरांत शेतींतले 300 नवे स्टार्ट अप सुरू जाले. हवामान बदल, शेतींतले प्रयोग, न्हंयांचे संशोधन हातूंत एनआयआो तशेंच सीएसआयआर खूब वावर करतात, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
