भांगरभूंय | प्रतिनिधी
रोमानियाची सिमोना हालेपान चवथ्या सिडा वयले पावला बाडोसाक 6-1 आनी 6-2 अशा सरळ सेटांनी हारोवन विम्बल्डन सर्तीच्या बायलांच्या एकोड्या गटाचे क्वॉर्टरफायनलींत सुवात मेळयली.
हालेपाचें विम्बल्डनांत हें सेगीत 11वें जैत थारलें, जाल्यार पांचवे खेपे क्वॉर्टरफायनलींत सुवात मेळयली. हालेपान 2019त वस्तादपण जोडिल्लें, पोरूं मात कोरोना महामारीक लागून सर्त रद्द करची पडिल्ली.
हालेपान मॅचीचेर पुर्णपणान आपलो शेक दवरलो. तिणें आपले सर्विसाचेर फक्त आठ गूण वगडायले. तशेंच आपले सर्विसीचेर एकोडो ब्रेक पॉयण्ट लेगीत वाटायलो.
हालेप फुडले फेरयेंत अमांडा अनिसिमोवा आड खेळटली. अमेरिकेचे अमांडान विम्बल्डनांत पदार्पण करपी फ्रान्साचे हार्मोनी टेनाक 6-2 आनी 6-3 अशा सेटांनी हारयलो. हार्मोनीन पयले मॅचींत सेरेना विलियम्साक हारयिल्ली.
आनीक एके मॅचींत अजला टोमलानोवीचान एलिज कॉर्नेटाक 4-6, 6-4 आनी 6-3 अशा तीन सेटांनी हारयलो. फुडले फेरयेंत ती एलेना रिबाकिना आड खेळटली. रिबानिकान पेत्रा मार्टिचाक 7-5 आनी 6-3 अशा सेटांनी हारयली.
मजगतीं, दादल्यांच्या एकोड्या गटांत आदलो वस्ताद राफायल नादालान लेगीत क्वॉर्टरफायनलींत सुवात मेळयली.
ताणें बोटीक वेन दी जांडशुल्पाक 6-4, 6-2 आनी 7-6 (8-6) अशा सेटांनी हारयलो.
सानिया-पॅव्हिक जोडी सेमींत
सानिया मिर्झा आनी मॅट पॅव्हिक हे भारत-क्रोएशियाचे जोडयेन विम्बल्डनाचे मिश्र गटाचे सेमी फायनलींत सुवात मेळयली. भारत-क्रोएशियाचे जोडयेन गॅब्रिएला डुब्रोवस्की आनी जॉन पिअर्स हे जोडयेक 6-4, 3-6 आनी 7-5 अशा तीन सेटांनी हारयली.
ह्या जैता सयत सानिया मिर्झा पयले खेपे विम्बल्डनांत सेमी फायनलींत पावली. सानियाची ही निमाणी विम्बल्डन सर्त आसा. ह्या हंगामा उपरांत ती टॅनिसांतल्यान निवृत्त जातली. क्वॉर्टर फायनलींत सानिया-पॅव्हिक हे जोडयेक फुडली चाल मेळिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
