भांगरभूंय | प्रतिनिधी
पी व्ही सिंधू सयत स्टार बॅडमिंटन खेळगडे राष्ट्रकूल खेळां सर्तींत वैयक्तीक भांगरा पदक जिखपाक यत्न करतले. ह्या वेळार दोट्टी गटांतल्या खेळगड्यां कडल्यान लेगीत पदकाची आसतली. दिनेश खन्नान 1966त राष्ट्रकूल खेळांतले बॅडमिंटन सर्तींत भारता वतीन पयलें पदक कांश्या पदकाच्या रुपान जिखिल्लें. तेन्ना पसून आतां मेरेन भारतान सात भांगरा पदकां सयत वट्ट 25 पदकां जिखल्यात.
फाटले खेपे गोल्ड कोस्टांत जाल्ले राष्ट्रकूल खेळां सर्तांत भारताच्या उत्कृश्ठ प्रदर्शन केल्लें. भारताच्या बॅडमिंटन पंगडान दोन भांगरा पदकां सयत वट्ट स पदकां जिखिल्लीं. हे खेपे लेगीत भांगर पदक जिखपाचो भारताचो यत्न आसतलो. हे खेपे फक्त सिंधूच न्हय जाल्यार किदम्बी श्रीकांत आनी लक्ष्य सेन हांच्या कडल्यान लेगीत भांगराची आस्त आसा.
दोट्टी गटांत चिराग शेट्टी आनी सात्विकसाईराज रंकीरेड्डी हे जोडयेन 2018त रुप्या पदक जिखिल्लें. पूण, हे खेपे भांगरा पदक जिखपाचो तांचो यत्न आसतलो. फाटले खेपे मिश्र गटांत भारताच्या युवा खेळगड्यांनी मलेशिया सारक्या बळिश्ठ पंगडाक हारोवन भांगरा पदक जिखिल्लें.
भारताक हे खेपे मिश्र गटांत अ गटांत ऑस्ट्रेलिया, श्रीलंका आनी पाकिस्तान ह्या पंगडां वांगडा दवरला. भारत सहज रितीन क्वॉर्टरफायनलींत पावपाची शक्यताय आसा. पूण, क्वॉर्टरफायनलींत ताचो कस लागतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
