सावळ हांणी पक्ष सोडिल्ल्यान मगोचेरपरिणाम जावचो नाः दीपक ढवळीकार

भांगरभूंय | प्रतिनिधी

-सावळ हांकां फुडाराच्या वाटचाली खातीर परबीं

पणजी: मगोंत आतां मेरेन आयले कितले आनी गेले कितले. जे पक्ष सोडून गेले तांची उपरांत कितें स्थिती जाली, हे गोंयकारांनी पळयलां. ताका लागून नरेश सावळ हांणी पक्ष सोडलो म्हूण ताचो कसलोच परिणाम पक्षाचेर जावचो ना. सावळ हांकां फुडाराच्या वाटचाली खातीर परबीं, अशी प्रतिक्रिया मगोचे अध्यक्ष दीपक ढवळीकार हांणी आमच्या प्रतिनिधी कडेन उलयतना दिली.
आदले आमदार नरेश सावळ हांणी कांय दिसां पयलीं मगोच्या कार्यकारी अध्यक्षपदाचो राजिनामो दिलो. उपरांत शुक्रारा दिवचले घेतिल्ले पत्रकार परिशदेंत तांणी दीपक ढवळीकार हांचे सयत मंत्री सुदिन ढवळीकार हांचेरूय आरोप केले.
2007 त आपूण हारले उपरांत 2011 मेरेन मंत्री विश्वजीत राणे हांणी आपली सगलीं कामां केली. फाटले वेंचणुकेंतल्या हारी उपरांत आपूण भाजपाचो नासतनाय मुख्यमंत्री डॉ. प्रमोद सावंत आनी भाजप प्रदेशाध्यक्ष सदानंद शेट तानावडे हांणी आपली विचारपूस केली. पूण ढवळीकार भावांनी केन्नाच चवकशी केली ना. ते सत्ते खातीर कितेंय करपाक शकतात. फाटले विधानसभा वेंचणुकेंत तृणमूल काँग्रेसी वांगडा युती करतना तांणी पक्षाच्या पदाधिकाऱ्यांक विस्वासांत घेतले ना. ढवळीकार भाव मनमानी कारभार करतात, अशी टिका सावळ हांंणी केल्ली. हे फाटभुंयेर, नरेश सावळ हांणी मगो पक्ष कित्याक सोडलो, हाची खरी कारणां सगल्यांकूच खबर आसात.
ताका लागून आपूण ते विशीं कितेंच उलोवचो ना. सावळ हांणी पक्ष सोडलो तरी ताचो कसलोच परिणाम पक्षाचेर जावचो ना. मगोचे मतदार, पदाधिकारी आनी कार्यकर्ते कायम पक्षा वांगडा आसात, अशें दीपक ढवळीकार हांणी नमूद केले.