भांगरभूंय | प्रतिनिधी
खबरां संस्था
नवी दिल्ली : भारताचा आघाडीचो रनर अविनाश साबळेन कॅलिफोर्निया (अमेरिका) हांगा सुरू आशिल्ले सावंड रनींग अॅथलेटिक्स सर्तींत दादल्यांच्या 5 हजार मीटर शर्यंतींत 30 वर्सांचो पोरणो राष्ट्रीय विक्रम मोडलो. 3000 मीटर स्टीपलचेसांतलो राष्ट्रीय विक्रम नांवार आशिल्ल्या साबळेन हे शर्यतींत 13 मिनटा आनी 25.65 सेकंद वेळाची नोंद केली. मात ताका 12वे सुवातेर खोस मानची पडली. साबले अमेरिकेच्या यूजीनांत 15 तें 24 जुलय मजगतीं जावपी संवसारीक वस्तादपणाचे सर्ती खातीर पात्र थारला.
टोक्यो ऑलिम्पिकांत महाराष्ट्राचें प्रतिनिधीत्व करपी बीड जिल्ल्यांतल्या साबळेन बहादूर पसाद हाचो 13 मिनटा 29.70 सेंकदाचो विक्रम मोडलो. हो विक्रम ताणे 1992 वर्सा बर्मिंगहॅम हांगा केल्लो. ताणे भारतीय अॅथलेटिक्सांतलो दुसरो सगळ्यांत पोरणो राष्ट्रीय विक्रम मोडला. सगल्यांत पोरणो राष्ट्रीय विक्रम मॅरेथॉनांत (2 वरां, 12 मिनटां) शिवनाथ सिंह हाच्या नांवार आसा. जो ताणे 44 वर्सां आदीं 1978 वर्सा केल्लो.
अर्दमॅरेथॉनांतलो राष्ट्रीय विक्रम साबळेच्या नांवार आसा. ताणे 2020 वर्सा दिल्लींत अर्दमॅरेथॉन शर्यतींत हो केल्लो. साबळेन आपलो 3000 मीटर स्टीपलचेसाचो राष्ट्रीय विक्रम जायते फावट मोडला. ताणे मार्चांत थिरूवनंतपुरम हांगा जाल्ले इंडियन ग्रां. प्री. 2त 8.16,21 सेकंद अश्या वेळाची नोंद करून सातवे फावट हो विक्रम मोडल्लो. आमी 3000 मीटर स्टीपलचेस आन 5000 मीटर अशे दोनूय सर्तींत अविनाशाक देंवोवपाचो विचार करतात अशें भारयीय अॅथलेटिक्स पंगडाचो मुख्य कोच राधाकृष्णन नायर हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
