भांगरभूंय | प्रतिनिधी
जपानाच्या टोकियो शारांत चालू आशिल्ले बीडब्ल्यूएफ संवसारीक वस्तादपण सर्तींत भारताची आदली वस्ताद सायना नेहवालान आपूण फॉर्मांत येता हाची चिन्नां दाखयत थेट प्री क्वॉर्टरफायनलींत सुवात मेळयली.
तिणें बायलांच्या एकोड्या गटांतले पयले फेरयेंत हॉंगकॉंगचे चेउंग नगन यी हिका 21-19, 21-9 अशा सरळ गेमींनी हारोवन सर्तीक उत्कृश्ट सुरवात केली.
प्रतिश्ठीत सर्तीचे दुसरे फेरयेंत पावपाक सायनाक खर मेहनत घेवची पडूंक ना. तिणें फक्त 38 मिनटांनी प्रतिस्पर्धी खेळगडयेचें आव्हान सोंपयलें.
सायना पयले फेरयेंत जैता सयत थेट प्री क्वॉर्टरफायनलींत सुवात मेळयली. दुसरे फेरयेंत तिची मॅच जपानाचे नोझोमी ओकुहारा आड जावपाची आशिल्ली. पूण, नोझोमी जखमी जाल्ल्यान तिणें सर्तींतल्यान नांव फाटीं घेतलें. अशे तरेन सायनाक फुडली चाल मेळ्ळी.
सायना पयले फेरयेंत नगनाक सरळ गेमींनी हारयली आसली तरी तिचे खातीर हें जैत सोंपें नाशिल्लें. पयले गेमींत 4-7 अशा फरकान फाटीं पडल्या उपरांत अणभवी सायनान नेटाचो खेळ करीत स्कोर 12-11 असो केलो. एकेक गुणा खातीर सायनाक खर संघर्श करचो पडलो. पूण, एकदा आघाडी घेतल्या उपरांत तिणें आपलो शेक कायम दवरलो. एका वेळार स्कोर 19-19 असो जालो. ते उपरांत सायनान सेगीत दोन गूण घेवन पयली गेम आपल्या नांवार केली.
दुसरे गेमींत मात सायनान आक्रमक खेळ केलो. ब्रेका मेरेन तिणें 11-6 अशी घटमूट आघाडी घेतिल्ली. तिणें दुसरी गेम 21-9 अशा व्हडा फरकान जिखून फुडले फेरयेंत सुवात मेळयली.
फाटल्या कांय काळां पसून सायना दुखापती कडेन झुजताली. ताका लागून तिचें प्रदर्शन लेगीत बाबत जातालें. कांय सर्तींनी तिचें आव्हान पयलेच फेरयेंत लेगीत सोंपिल्लें. पूण, आपूण आतां पुर्ण तंदुरुस्त आसा आनी पुर्ण फॉर्मांत येवपाक लागल्या अशें तिणें पयले मॅची वरवीं स्पश्ट केलें.
जॉली-गोपीचंद जोडी जिखली
त्रिसा जॉली आनी गायत्री गोपिचंद हे जोडयेन बायलांच्या दोट्टी गटाचे फुडले फेरयेंत सुवात मेळयली. जॉली-गोपिचंद जोडयेन मलेशियाचे येन युआन लो आनी वेलेरी सियो हे जोडयेक 21-11 आनी 21-13 अशा फरकान हारयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
