भांगरभूंय | प्रतिनिधी
भांगरभूंय पत्रक
पणजीः धर्मश पंडित संचलीत मुंबयच्या प्रिन्स प्रॉडक्शनाची नि्र्मणी आशिल्ल्या ‘टेक इट इझी’ ह्या पालक, भुरगीं हांच्या नाते संबंदाचेर आदारीत आशिल्लो हिंदी सिनेमा साखळेच्या रवींद्र भवनांत शेनवार 21 मेरसकाळीं 10 वरांचेर दाखयतले. ह्या वेळार मुख्यमंत्री डॉ प्रमोद सावंत मुखेल सोयरे म्हणून हाजीर रावतले. साखळे रवींद्र भवनाचो उपाध्यक्ष विठोबा घाडी, इंदिरा गांधी राष्ट्रीय कला केंद्राच्या गोंय फाट्याचे क्षेत्रीय संचालक डॉ दत्तगुरू आमोणकार, समाज वावुरपी दत्ताराम चिमुलकार मानाचे सोयरे म्हणून हाजीर रावतले. सिनेमाचो निर्मातो धर्मेश पंडित, लेखक आनी दिर्गदर्शक सुनील प्रेम व्यास, सहनिर्मातो सुनील भुमकरा हे हाजीर रावतले. सिनेमा फुकट दाखयतले, साखळी, दिवचल, सत्तरी आनी आशी- कुशीच्या सिनेमा मोगींनी हे संदीचो लाव घेवचो अशें आयोजकांनी मागलां. कांय सिटां निमंत्रितां खातीर राखीव आसतली. सगल्यांनी सकाळीं 9.30 मेरेन आपापल्या सिटांचेर बसचें अशें कळीत केलां.
पालक आनी तांच्या भुरग्यां मदले नाते संबंद हे मध्यवर्ती कल्पनेचेर ‘टेक इट इझी’ ह्या सिनेमाची निर्मणी केल्या. पालकांच्या अपेक्षांच्या वज्या खाला तांच्या भुरग्यांचें सैमीक गुण आनी तांची सपनां कशी चेंपणा खाला येतात. ताका लागून तांच्या मुखामळा वयलें हांशें कशें ना जाता हाचेर सिनेमांत उजवाड घातला. भुरग्यांचो सैमीक कल आनी तांचे मदीं मुदलांत आशिल्ले कला गुण हाका उर्बां दिवून तांचो उज्लल फुडार घडोवन हाडपाक पालकांनी प्रेरीत जावपाक जाय हो संदेश दिवपाचो यत्न ह्या सिनेमावरवीं केला. हो सिनेमा देशांतल्या 7 प्रतिश्ठीत सिनेमा महोत्सवांत दाखयला आनी ताका पुरस्कार लेगीत फावो जाल्यात.
सिनेमांत विक्रम गोखले, सुलभा आर्या, अनंग देसाय, राज झुत्शी, जॉय सेनगुप्ता, विरेंद्र सक्सेना, सुप्रिया कर्णीक, दीपनिता शर्मा, ज्योती गौबा ह्या ज्येश्ठ कलकारां वांगडा यश घाणेकार, प्रसाद रेड्डी ह्या बाल कलाकारांच्यो सिनेमात मुखेल भुमिका आसात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
