भांगरभूंय | प्रतिनिधी
मुख्यमंत्री: कुडणें रोजगार मेळावो उमेदीन
दिवचल: हेर राज्यांचे तुळेंत गोंयांत रोजगाराची अपूर्व संद सरकारी आनी खाजगी मळार आसा. आदरातिथ्य, पर्यटन, हॉटेलिंग मळार हजारांनी नोकर्यो आसात. तरणाट्यांनी आपले मानसिकतायेंत बदल घडयत फकत सरकारी नोकरीच जाय असो हट्ट सोडून उपलब्ध कुशळटाय उदरगत संदीचो लाव घेवचो. उण्यात उणें दोन लाख रोजगार युवकांक खुणायतात. जो बेरोजगारीचो फटींग आंकडो दिला तो पुरायेन दिकाभूल करपी आशिल्ल्यान सरकार व्हडा प्रमाणांत खाजगी आनी सरकारी मळार रोजगार संदी उपलब्ध करता, अशें मुख्यमंत्री डॉ. प्रमोद सावंत हांणी सांगलें.
कुडणें हांगा माया यच. आर. सॉलू शन्सा वतीन आयोजीत रोजगार मेळाव्याचें आयोजन महालक्ष्मी विद्यालयांत केल्लें. ह्या वेळार माचयेर यतीन काणेकार, सरपंच राजन फाळकार, पूर्वी मलिक, बाबलो मलिक, गुरुदास मलिक, दामोदर पेठकार, सुनिधी कामत, दिपिका नायक आनी हेर मानेस्त हजर आशिल्ले.
स्वयंपूर्ण, आत्मनिर्भर गोंयचो नारो येसस्वी करपाचो आमचो संकल्प आशिल्ल्यान हे खातीर खूबशे पर्याय उपलब्ध आसात. वेवसायीक जावन हेरां खातीर रोगजार उपलब्ध करपाचें ध्येय बाळगील्यार तातूंतल्यान खूब कितें साध्य जातलें. खाजगी मळार खूबश्यो संदी उपलब्ध जावच्यो देखून उद्देगाचे नदरेन कुशळटाय विकसीत करपा खातीर आमी विशेश लक्ष दिलां. हाका बरो प्रतिसादूय मेळटा. सरकार सगळे तरेन रोजगार उपलब्ध करपा खातीर खूबश्यो येवजण्यो चालीक लावपाचें आसा. ताका लागून तरणाट्यांनी जागृत रावल्यार दरेकल्याक काम दिवपाचो आमचो जो संकल्प आसा तो पुराय करप सहज शक्य जातलें, अशें मुख्यमंत्र्यान फुडें म्हणलें.
ह्या रोजगार मेळाव्याक बरो प्रतिसाद मेळ्ळो.
राजन फाळकार हांणी येवकार दिलो. सचीन घाडी हांणी सुत्रसंचालन केलें. पूर्वी मलिक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
